Lubhalwe nguDoreen Mokgolo
- UCyril Ramaphosa ucele i-SACP ukuthi ingahlubuki kwi-ANC okhethweni oluzayo lwasekhaya.
- I-SACP imile kwelokuthi izozingenela yodwa okhethweni lwasekhaya ngemuva kokungaboni ngaso linye mayelana nokusebenza neDA.
UMengameli uCyril Ramaphosa wenze isicelo esijulile kwilungu lombimbi lanxantathu lomzabalazo ukuthi bangalihlamuki umbimbi
URamaphosa unxuse abaholi be-SACP ukuthi bangabuphuli ubungani babo ne-ANC.
UMengameli we-ANC ubekhuluma emcimbini wokugubha iminyaka engamashumi amathathu kwashona umholi wamaKhomanisi uJoe Slovo eSoweto ngoMsombuluko.
URamaphosa uthe izinhlangothi zombili ziyadingana.
“I-SACP iyinsika ye-ANC; ngokufanayo ne-ANC ibe yinsika ye-SACP,” usho kanje.
“Zombili lezi zinhlangano zifana namawele. Ziyadingana, ukuhlukana kwazo kuzoyithena amandla i-ANC.”
UMengameli ubephendula esinqumweni seQembu lamaKhomanisi sangenyanga edlule sokungenela ukhetho lwasekhaya yodwa.
I-SACP idinwe ukuthi i-ANC yaziba izikhalo zayo ngokusebenzisana ne-DA emikhandlwini.
URamaphosa uthe iSACP isizile ekulolongeni ukucabanga kwe-ANC eminyakeni eminingi.
“Lezi zinhlangano zombili zenze izinhlelo ezifanayo eziqhubekisele phambili umgomo wabantu baseNingizimu Afrika. Kumele sicoshe umkhonto lapho uwe khona,” esho.
“I-ANC kumele izimisele futhi izilungiselele ukulalela amaqabane athi i-GNU ibe yiphutha.”
Uvumile ukuthi i-ANC ayenzanga kahle okhethweni lokuchibiyela lwakamuva kodwa wathi iqembu alikakahlulwa.
“Umphumela yokhetho ukhombise ukuthi i-ANC ayenzanga kahle, kodwa ayisho ukuthi ihluliwe,” esho.
“Kuthumele umyalezo ocacile wokuthi kumele senze okuhlukile ngokushesha ukuze sibuyise ithemba labantu bakithi kwi-ANC.
Kodwa umholi weSACP uMnuz Solly Mapaila uthe basazolungenela bodwa ukhetho lwasekhaya.
“Siyinhlangano ngeke sivume ukuthi umnyakazo wethu ucekelwe phansi sihlale phansi singenzi lutho ngakho,” usho kanje.
“Sizolwa nabo kuze kufike ekugcineni, siyenqaba ngokuphelele i-neoliberalism futhi sikholelwa ukuthi sinezindlela zokungenelela ngenqubomgomo yezimali kanye nenqubomgomo yokuqapha.”
Osesithombeni esingenhla: UMengameli uCyril Ramaphosa.
Umthombo: Sithunyelwe