Lubhalwe nguSihle Mavuso
Uqhubekile nangoLwesihlanu ekuseni umdonsiswano mayelana nokthi imaphi amalungu oMkhonto weSizwe (MK), KwaZulu-Natal okufanele afungiswe esiShayamthetho sesifundazwe njengazomela leli qembu.
Lokhu kungemuva kokuthi uhlu lwamalungu esiShayamthetho sesifundazwe (MPLs) eshintshiwe futhi kwasuswa amanye amalungu aphezulu eqembu leMK oholwa nguMnuz Jacob Zuma.
Ingxabano yokubanga uhlu iqale ngoLwesine ntambama. Kukholakala ukuthi udaba selulungisiwe, konke sekumi ngomumo mayelana nokufungiswa kwamalungu amasha eqembu.
Nokho ngoLwesihlanu ekuseni kuvele uhlu olusha, kwafungiswa amalungu, kwasuka umsindo ngaphandle kwesiShayamthetho.
UMnuz Nhlanhla Ngidi owayenguMqondisi-Jikelele wesifundazwe ubengekho kulolu hla. UNgidi uke waqhwakela phezulu, okwenza ukuthi abaningi bacabange ukuthi nguyena ozoqokwa njengoNdunankulu weqembu.
UThulani Gamede owagcina enxuse uZuma ukuthi ahole iSouth African National Civics Organisation (Sanco) njengoSihlalo wayo esifundazweni nowagcina esejoyina i-MK, naye ukhishiwe ohlwini lwayo.
UGamede ukuqinisekisile kwiScrolla.Africa ukuthi usekhishiwe ohlwini noNgidi kanye nenkosi yaseMaqonqo uNhlakanipho Maphumulo.
“Ngifike lapha ngilungiselele ukufungiswa sathola ukuthi sesikhishiwe ohlwini. Asazi ukuthi kungani,” kusho uGamede.
NgoLwesihlanu ekuseni uGamede, uNgidi noMaphumulo bebebambe umhlangano ngaphandle kwesiShayamthetho kodwa bekungakacaci ukuthi bekudingidwani.
Abasha kulolu hlu nguSimanga Mabaso ongusomabhizinisi waseMsinga noSimphiwe Moyo ongumthwebuli wezithombe osemthethweni weqembu.
Osesithombeni esingenhla: UNhlanhla Ngidi (ogqoke isudi eluhlaza okwesibhakabhaka) ngemuva kokukhishwa ohlwini.
Umthombo: USihle Mavuso