Menzi Magubane
Ngemuva kokusiza i-Al Ahly ukuthi ithole izindondo zethusi ngokulandelana kwi-Fifa Club World Cup, kuthiwa uPitso Mosimane ubonwa njengomqeqeshi ophumelele ukudlula bonke emlandweni weqembu.
Lo mqeqeshi waseNingizimu Afrika usedlule uManuel Jose, owaba ngumqeqeshi wokuqala ukuholela i-Red Devils endaweni yesithathu esigabeni somhlaba ngo-2006.
UJose, ongumPutukezi, usathathwa njengomqeqeshi ohamba phambili kuleli qembu ngemuva kokuwina izindondo ezingu-20 emiqhudelwaneni emithathu eyahlukene neqembu.
Kwabanye uMosimane usezingeni elilodwa noJose futhi kungenzeka abonakale engcono kunaye uma ehlala kuleli qembu.
Lo mqeqeshi oneminyaka engu-57 ubudala usezokwengeza isikhathi sakhe sokuhlala e-Egypt. Abamele i-MT Sport Agency, eholwa ngunkosikazi wakhe uMoira, sebezophothula izingxoxo zesivumelwano esisha, esingahle simenze athole u-R2,5 million ngenyanga, ngokusho kwemibiko yase-Egypt.
Njengoba isiphelile i-Club World Cup, ukwelulwa kwenkontileka kulindeleke ukuthi kuphothulwe maduze njengoba isivumelwano sakhe esikhona manje siphela ngoNhlangulana.
Umgcinimafa wekilabhu uKhaled Mortagy utshele i-ONTime Sport TV ngeSonto ukuthi isinqumo sisezandleni zikaMahmoud El-Khatib kanye nekomiti lokuhlela leqembu.
“Akungatshazwa ukuthi uMosimane usefeze okuningi,” kusho uMortagy.
Wengeze ngokuthi u-El-Khatib umtshele ukuthi uma nje iqembu libuyela e-Cairo, ikhasi le-Club World Cup lizovalwa futhi bazogxila kwisicoco se-Champions League se-11.
Esikhathini esingaphansi kweminyaka emibili ekuleli qembu, uMosimane usewine izindondo eziyisithupha – izicoco ze-CAF Champions League zilandelana, ezimbili ze-CAF Super Cups, Egypt League, ne-Egypt Cup.
Khonamanjalo, ngoMgqibelo ebusuku uMosimane uhambe nendondo yango-2022 ye-Ubuntu Sports Diplomacy ngemuva kokusebenza kahle kwakhe e-Egypt.
Umthombo wesithombe: @AlAhly
.
