UPatrice Motsepe sekusele kancane ukuthi abe ngumengameli we-CAF

Sizwe Sibiya

Isikhulu sezimayini nomnikazi weMamelodi Sundowns uPatrice Motsepe nguyena kuphela umuntu ozongenela ukhetho lokuba ngumengameli we-Confederation of African Football.

Lokhu kulandela ngemuva kokuba u-Ahmad Ahmad enqatshelwe ngoMsombuluko ngemuva kokuvinjelwa kwakhe iminyaka emihlanu yi-Fifa ephinde yehlisa kwaba iminyaka emibili, kodwa noma kunjalo akakwazi ukungenela ukhetho.

Ekuqaleni bebebathathu abebengenele lesi sikhundla, manje esiphethwe nguConstant Omari okwesikhashana.

U-Augustin Senghor (umengameli we-Senegalse Football Federation), uJacques Anouma (owayengumengameli we-Ivorian Football Federation) kanye no-Ahmed Yahya (umengameli we-Mauritania Football Federation) bonke bahoxile bakhetha ukusekela isiqumama saseGa-Rankuwa.

I-Fifa kubikwa ukuthi incamela uMotsepe futhi yeluleke laba abanye abathathu ukuthi baseke uMotsepe ukuze bathole ezinye izikhundla ze-CAF, kubika i-AFP ngesonto eledlule.

Ngemuva kokhetho kulindeleke ukuthi uSenghor noJahya babe ngamaphini kamengameli kanti u-Anouma uzoba ngumeluleki kaMotsepe.

Ngemuva kokiswa ngempumelelo u-Ahmad wase-Madagascar, obevinjelwe ngenxa yokungaziphathi kahle nangokusebenzisa kabi isikhundla sakhe, uMotsepe manje usenomunye umsebenzi omkhulu abhekene nawo.

Kumele akhethe umphathi olandelayo weSundowns ngoba akakwazi ukuba yingxenye yeqembu elibambe iqhaza kwi-CAF Champions League.

Ukhetho lukaMengameli we-CAF luzobanjelwa e-Rabat, e-Morocco, ngoLwesihlanu mhla zi-12 kuNhlangulana.

Umthombo wesithombe: @MhlengiNgcobo13