Lubhalwe nguMichael Madyira
UJaco Peyper uzoba unompempe wokuqala wakuleli ukuphatha umdlalo wamanqamu we-Champions Cup.
Lo nompempe (42) uzophatha umdlalo wamanqamu ozoba ngomhlaka-20 kuNhlaba phakathi kwe-Leinster nompetha abavikela isicoco i-La Rochelle enkundleni yezemidlalo i-Aviva e-Dublin.
Uzosizwa ngonompempe baseNgilandi uKarl Dickson noChristophe Ridley. Omunye waseNgilandi uTom Foley uzoba isikhulu semidlalo kamabonakude kanti uBeth Dickens wase-Scotland nguyena ozoba ukhomishana womdlalo.
I-European Professional Club Rugby ikuqinisekise ukuqokwa kukaPeyper esitatimendeni.
Ngenyanga edlule uPeyper uphathe owandulela owamanqamu we-Champions Cup obuphakathi kwe-La Rochelle ne-Exeter.
Lo nompempe owazalelwa e-Bloemfontein uzobuyela enkundleni yezemidlalo i-Aviva okokuqala kusukela kowamanqamu we-Six Nations ngoNdasa lapho akhipha khona uFreddie Steward waseNgilandi ngekhadi elibomvu bebhekene ne-Ireland ngoNdasa ngaphambi kokuthi ikhadi elibomvu lihoxiswe.
UPeyper uzophinde abe ngomunye wonompempe abangu-26 abazophatha imidlalo yeNdebeni yoMhlaba yombhoxo e-France ngoMandulo.
Ngesonto eledlule ubephethe umdlalo we-United Rugby Championship wama-quarterfinal phakathi kweStormers namaBulls enkundleni yezemidlalo i-Cape Town.
Esithombeni esingenhla: UJaco Peyper
Umthombo wesithombe: SA Rugby