Lubhalwe nguBuziwe Nocuze
Unogada uLungiswa Dakuse uvuka engakashayi u-4 ekuseni, athumele u-R2,500 nyanga zonke futhi akakwazi ukuthenga izingubo zokugqoka noma ukuthenga izinto azithandayo.
Uthi amanani okudla alokhu enyuka ekubeni umholo ungashintshi, okushiya imindeni yase-Eastern Cape idonsa kanzima ngisho nokukhokhela amatekisi uma beyothenga igilosa.
Njalo ekuseni ngo-3:40 ekuseni, unogada waseKapa uLungiswa Dakuse uvuka alungele ukuya emsebenzini. Ngo-4:50 ekuseni, usevele ephuthuma esitobhini.
Kodwa nangawo wonke umzamo wakhe, iholo lakhe lincane kakhulu.
UDakuse uthumela u-R2,500 njalo ngenyanga kumama wakhe e-Eastern Cape, ogade ingane yakhe. “Ngisho noma ingane yami ibingahlali nabo, bengizoyithumela imali yokudla,” kusho yena.
Ngemuva kokukhokha u-R1 500 wegilosa, u-R1 000 wemoto kanye no-R1 500 wokuqasha usala engenamali.
Ubethumela u-R1 500 ekhaya, kodwa ukunyuka kwentengo yokudla kwamphoqa ukuthi anyuse leyo mali. “Kwadingeka ngiyeke ukuzikhipha nabangane,” kusho yena. “Leyo mali manje iya ekudleni.”
Noma kunjalo, akwanele. “Emalini engu-R2 500 engiyithumela ekhaya basebenzisa u-R80 ukuya edolobheni nokubuya, baze bakhokhele abashayeli bamatekisi ukuthi baphathe ukudla emakethe, kuye ngokuthi bathengani,” usho kanje.
UDakuse uthi wake wakuthokozela ukwenza izinzipho nokugqoka amaweave kodwa sezadlula lezo zinsuku.
“Okubuhlungu mukuthi yonke into ilokhu ikhuphuka ngenkathi umholo unganyuki,” kusho yena. “Angizithengi izingubo njalo.
Ngithengela ingane yami kuphela ngoLwezi, futhi ngikhetha osayizi abakhulu ukuze zikhule naye.
Uvakashela ekhaya kanye kuphela ngonyaka.
“Uma izinto ziqhubeka kanje, abantu abaningi ngeke ngeke bakhiphe ukudla ngoKhisimusi bazophekela imindeni yabo kuphela,” kusho yena. “Izindleko zokuphila eziphakeme ziyayishintsha indlela esiphila ngayo.”
Esithombeni esingenhla: I-weave.
Umthombo wesithombe: Pexels