Lubhalwe nguRorisang Modiba
UThembinkosi “TK” Nciza, onguNobhala we-ANC e-Gauteng, ukhulume engqungqutheleni yomculo wamapiano Africa Summit e-Newtown, eGoli.
Umcimbi uqale ngoLwesine kanti ubuhlanganisa noTK, osenesipiliyoni seminyaka engaphezu kuka-20 nenkampani yakhe, i-TS Records.
UTK ukhulume ngomthelela walo mculo kwezomnotho.
“Umculo wamapiano ungafukula ezomnotho yingakho kufanele wesekwe. Usuqashe abantu abasha abaningi, kusukela kwabanethonya kuya koDJ nabaculi. Unomthelela omkhulu emphakathini,” usho kanje.
“Umculo wamapiano yinto esiziqhenya ngayo futhi lesi sizukulwane samanje sizenzele ngokwaso ukuba ube nedumela kangaka. Kufanele senze okwengeziwe, sibaseke kakhulu ukuze bakwazi ukuvakashela e-Europe, e-Asia nakwamanye amazwekazi.”
UTK uncome ubuhlakani besizukulwane samanje ekwenzeni lo mculo futhi wacela ukwesekwa okwengeziwe kwamapiano, njengendlela ezinye izinhlobo zomculo zamazwe ngamazwe ezisekelwa ngayo.
Nakuba indima yakhe yamanje idinga ukugxila okukhulu, uTK usaxhumene nemboni yezomculo.
“Ngizohlale ngisebenzisana nomkhakha wezomculo ngoba yilapho engiphuma khona, futhi ngiyaziqhenya ngalokho ngoba kungilungiselele uhambo lwami lwamanje,” usho kanje.
Osesithombeni ngenhla: UThembinkosi “TK” Nciza.