UNgqongqoshe ufuna ubukhosi bamaNgisi nobukaZulu busebenzisane ukwenza imali

Lubhalwe nguCelani Sikhakhane

UNgqongqoshe weziMali KwaZulu-Natal ufuna ubukhosi bamaNgisi bubambisane nobakaZulu ukuzama okuxhumana ekufukulaneni kwezomnotho.

Lokhu kuvele emhlanganweni obuphakathi kweSilo uMisuzulu kaZwelithini noNgqongqoshe weziMali KwaZulu-Natal uMnuz Francois Rodgers. 

Lo mhlangano ubumayelana nokuqhamuka neqhingasu ekutheni iNdlunkulu kaZulu neyamaNgisi bangasebenzisana kanjani ekwakheni umnotho oqinile nozokwenza ubukhosi bakaZulu bungathembeli kuhulumeni. 

Okhulumela uNgqongqoshe uRodgers uMnuz Nkosikhona Duma uthe kulo mhlangano uRodgers ubhunge kabanzi neNgonyama ngokungena ebhizinisini lezolimo nelenyama ukuze iNdlunkulu izenzele imali.

“Mayelana nodaba lobudlelwano nobukhosi bamaNgisi, uNgqongqoshe uhlela umhlangano neNxusa laseBrithani ukuze kuqiniswe lezi zinhlelo. Okunye okwamukelwe iSilo umbono wokungena ebhizinisini lenyama nezolimo ukuze iNdlunkulu inganciki kakhulu kuhulumeni ngokwezimali,” kusho uDuma.

Kwenzeka lokhu nje uhlaka olubhekelela izindaba zaseNdlunkulu ehhovisi likaNdunankulu waseKZN okuyi-Royal Household Trust, lulokhu lusolwe njalo ngokufaka iNgonyama ehlazweni kanye nokwehluleka ukwenza umsebenzi.

Ngesonto eledlule lolu hlaka litshele ikomiti leziNdaba zaseNdlunkulu kaZulu eSishayamthetho ukuthi lichithe imali enguhhafu wesigidi lizama amabhizinisi angalungi. 

Lolu hlaka lwasungulwa kusakhona uDkt Zweli Mkhize ngenhloso yokuthi izindaba zeSilo ziphathwe ngesineke bese lusebenzela ekutheni iNdlunkulu kaZulu ikwazi ukuzingenisela imali ngaphandle kwemigudu ye-Public Finance Management Act.

Kuyimanje kukhalwa ngokuthi iNdlunkulu kaZulu isibhubhudle isabelo sayo esingu-R70 million ngale ndlela yokuthi sekusele u-30% wemali ekubeni kusasele izinyanga eziyisithupha kuphele unyaka wezimali.

Izihloko zakamuva