Lubhalwe nguCelani Sikhakhane
UMengameli wamaBhinca uNgizwe Mchunu udinwe ukubona indodakazi yowayenguMengameli uJacob Zuma iqhumisa uhleko noMengameli Cyril Ramaphosa ePhalamende.
Lokhu kwenzeke ngesonto eledlule ngesikhathi lapho uRamaphosa ehambe ebingelela amalungu ePhalamende.
Kuthe esabingelela uJaji John Hlophe kwaqhamuka uDuduzile maZuma-Sambudla wazwakala ethi Mengameli nokube ukusuka kukaRamaphosa kuHlophe wayoxhawula uDuduzile beshaya nohleko olukhulu.
UNgizwe uvele wabhala ezinkundleni zokuxhumana wathi ukube nguye lo oqhumisa uhleko noRamaphosa besekuzothiwa ixoki lo mdayisi.
“Ukube yimi nje lo owenze lokhu ngabe sengithukwe ngabizwa ngexoki nomdayisi,” kusho uNgizwe.
Ubekusho lokhu ngoba kuthe kuza ukhetho wabamanapha inhlamba esolwa ngokudayisa uZuma waqoka uRamaphosa.
Lokhu kumufakele isigcwagcwa kwamanye amabhinca nakubalandeli boMkhonto weSizwe.
Isigcwagcwa sakhe sigcine sidala nokuthi umcimbi wakhe kaMaskandi wawusePeople’s Park owawuqondaniswe noweMK owawuseGoli e-Orlando ubenedlanzana labantu ababewuhambele.
Abanye babesho nokuthi uNgizwe udayise ngoZuma ezitheni zakhe ekubeni wayezenza umuntu oyomfela ngesikhathi sezibhelu zango-2021.
Ngakolunye uhlangothi uDuduzile ubuye wafaka isithombe sakhe beshaya uhleko noRamaphosa enkundleni yokuxhumana okungu-X lapho ethe: “Mina ngiyindodakazi kaMengameli uGedleyihlekisa Jacob Zuma,”