Arthur Greene
USihle Zikalala, onguNdunankulu waKwaZulu-Natali njengamanje usexolisile “ngezinga lamandla alisebenzisile” ngemuva kokuthwetshulwa bukhoma eshaya ngezibhakela okusolwa ukuthi uyisela.
Lesi siqeshana esisakazwe ngoLwesine sithwetshulwe ngabasebenzi bezindaba ze-Newsroom. Kubonakala uZikalala ezama ukubamba insizwa ebizama ukubaleka. UZikalala ubonakala emshaya ngenqindi kabili ngaphambi kokuba le nsizwa ikwazi ukubaleka.
Esitatimendeni esikhishwe kamuva ngoLwesine, ihhovisi likaZikalala lithe uNdunankulu “uxolisa kakhulu” ngalesi sigameko.
Kodwa-ke, esitatimendeni esifanayo, uxolise kuphela “ngezinga lamandla” elisetshenzisiwe, njengoba “ukubamba isela kufanelekile.”
Isitatimende sifundeka kanje: “UNdunankulu uyazisola ngezinga lamandla asetshenzisiwe ekubambeni isela ebelizama ukweqa nezimpahla ebezebiwe esitolo esiseduze. Noma isenzo sokubamba isela sinesizathu, indlela okwenziwe ngayo lokhu uyazisola kakhulu.
“UNdunankulu uyaxolisa ngalesi sehlakalo. UNdunankulu ukholelwa ukuthi udlame lomphakathi alunandawo emphakathini kanjalo ngokufanayo nalabo abenza izenzo zokubhubhisa abanandaba namagugu esizwe sakithi.”
IPhini likaMengameli we-Economic Freedom Fighters, uFloyd Shivambu, ubhale wathi: “USihle Zikalala uyisilima ngempela futhi kumele abhekane nengalo yomthetho. Uvuna izigilamkhuba [ezingenzi okusemthethweni] nezigebengu ezicabanga ukuthi zivunyelwe ukuhlasela nokubulala abantu e-Phoenix nakwezinye [izingxenye] zaseKZN. Uyisiwula!”
Eveza lesi siqeshana ku-Twitter, umhlaziyi wezepolitiki uJustice Malala ubhale ukuthi “UNdunankulu waseKZN uSihle Zikalala ufuna uJacob Zuma axolelwe futhi adedelwe ejele. Kulesi siqeshana ubonakala eshaya ingane okusolwa ukuthi ibintshontsha. Uziveze yena ukuthi ungumuntu onjani. Ukholelwa ekushayeni abahlwempu. Nokudedela ngoshwele kwabaxhumene.”
Umthombo wevidiyo: @MondeTSibisi