Lubhalwe nguRazeen Gutta
UKelvin Kiptum wase-Kenya usale ngemizuzwana engu-16 ukuthi agijime isikhathi esishesha kakhulu esake saba khona ngeSonto.
Wephule irekhodi ngesikhathi ewina umjaho wabesilisa we-London Marathon kanti umsubathi wase-Holland owazalelwa e-Ethiopia uSifan Hassan umangaze abaningi ngesikhathi ewina kowabesifazane.
Ngosuku lapho uSir Mo Farah abezothatha khona umhlalaphansi omphetha abasha babhalisa amagama abo ezincwadini zomlando.
Isihlabani sase-Kenya, uKiptum uphume entanjeni ngesikhathi esingu-02:01:25 wephula irekhodi lika-Eliud Kipchoge.
Lo msubathi (23) uphuthelwe irekhodi lomhlaba elaqoshwa uKipchoge eBerlin nyakenye ngemizuzwana engu-16 njengoba eqede ekhathele emjahweni omuhle kakhulu.
Mayelana nompetha uFarah ophume endaweni yesishiyagalolunye ngesikhathi esingu-02:10:28; uphinde wathinta isinqumo sakhe sokuthatha umhlalaphansi ngemuva komjaho we-Great North Run ozoba ngoMandulo.
“Nginikele ngakho konke kodwa umzimba wami awuzange ungivumele futhi yilapho owazi ukuthi sekuyisikhathi sokuyeka,” esho.
USifan Hassan (30) ongumpetha wama-Olympic wamamitha angu-5,000 nangu-10,000 ugijime kulo mjaho okokuqala ngqa; futhi naphezu kokuwa ngemuva kwamamayela angu-15 uye wavuka wazicosha waphuma phambili emjahweni wabesifazane.
“Ngazalelwa isiphithiphithi. Ngesikhathi ngivuka ekuseni bengizitshela ukuthi ngiyisiphukuphuku ngokugijima kulo mjaho ngazibuza ukuthi yini inkinga yami,” kusho uHassan kwi-The Guardian.
“Bengicabanga ukuthi ngizoma ndawana thize ngoba ngesikhathi ngizama ukugijima kakhulu bengilimala. Kodwa ngicabanga ukuthi kufanele ukuthi ngokulandelayo ngithole ulwazi oluthile lokugijima ibanga elide. Ukuqeda [ngingowokuqala] akuzange kungene engqondweni yami.”
Esithombeni esingenhla: UKelvin Kiptum
Umthombo wesithombe: @LondonMarathon