Lubhalwe ngu-Anita Dangazele
● Umsolwa oneminyaka engu-20 ubudala obandakanyeka esigamekweni sokudubula e-Lusikisiki uboshwe ebhasini eliya eKapa, ngemva kwezinyanga kuboshwe asolwa nabo.
● Abasolwa abayisishiyagalombili, ababhekene namacala angu-18 okubulala, bazovela eNkantolo yesiFunda e-Lusikisiki ngomhlaka-17 kuNhlolanja ngemuva kokulahla izicelo zebheyili.
Omncane emadodeni ayisishiyagalombili ababoshelwe isigameko sokudubula, esadlula nemiphefumulo engu-18 e-Lusikisiki ngomhlaka-28 kuMandulo 2024, uvele enkantolo ngoLwesibili.
USongezo Vuma (20), uboshwe ngeSonto ebusuku e-Qonce esebhasini eliya eKapa, ngemuva kwezinyanga ezintathu kuboshwe asolwa nabo.
Ubegcwele amathafa kusukela kwenzeka lesi sibhicongo ngoMandulo nyakenye.
Amaphoyisa ase-Eastern Cape ayekhiphe umehlokaboni ka-R50 000 kongaba nolwazi lokuthi ukuphi ngoLwezi.
Okhulumela amaphoyisa esifundazweni uLieutenant-Colonel Siphokazi Mawisa ukuqinisekisile ukuboshwa kwabasolwa.
“Amaphoyisa avimbei ibhasi esiteshini saseKing Williams Town ebeliya eKapa. Ngesikhathi besesha ibhasi, bathole owesilisa (20), obekunguye yedwa umsolwa obengakaboshwa esigamekweni sokudubula e-Lusikisiki. Ube eseboshwa ngokushesha futhi uzobekwa icala ngokufanele,” esho.
Abamangalelwa naye uSiphosoxolo Myekethe (45), u-Aphiwe “AP” Ndende (25), uLwando Antony Abi (33), uBonga Hintsa (31), uZenande Paya (38), uMawethu Nomdlembu (36), kanye nomsolwa ongungqondongqondo uMzukisi Ndamase, bonke bahoxise isicelo sabo sebheyili ngesikhathi bevele enkantolo ngaphambilini.
Bonke babhekene namacala angu-18 okubulala nokutholakala nezibhamu nezinhlamvu okungekho emthethweni.
Umsolwa wokuqala, uMyekethe, waboshwa ngomhlaka-7 kuMfumfu emzini wakhe e-Mthimde Location, endaweni yase-Mamfengwini esifundeni sase-Lusikisiki.
Ababili kulaba, uNende noHintsa, baboshwa e-Port Shepstone kwathi u-Abi waboshwa e-East London ngomhlaka-16 kuMfumfu 2024.
Abanye abasolwa, uPaya noNomdlembu, baboshwa e-Flagstaff ngomhlaka-17 kuMfumfu 2024, bephethe izibhamu ezine nezinhlamvu okusolwa ukuthi zayiswa kwezinye izindawo ngemuva kokubulawa kwabantu e-Lusikisiki esigodini sase-Ngobozana.
Umsolwa ongungqondongqondo, uNdamase uboshwe ngaphakathi e-Wellington Correctional Centre, nokuyilapho edonsa khona udilikajele kanye neminyaka engu-15 ngamacala okubulala nokubamba inkunzi.
Okhulumela i-NPA esifundeni, uNokuthula Makupula, uthe uVuma njengabo bonke abasolwa naye wasichitha isicelo sakhe sebheyili.
“Udaba ludluliselwe eNkantolo yesiFunda e-Lusikisiki, lapho ezohlangana nabanye abasolwa abayisikhombisa ngomhlaka-17 kuNhlolanja,” esho.
Esithombeni esingenhla: Umsolwa osemncane ecaleni lokubulala abantu abaningi e-Lusikisiki nguSongezo Vuma oneminyaka engu-20 ubudala.
Umthombo: Sithunyelwe