Lubhalwe ngu-Anita Dangazele
Oshayasibhamu abane badubule bebhekise emotweni yomshushisi obenomkakhe nendodana yabo eneminyaka engu-12 ubudala eKariega.
Lokhu kuhlasela kulandela izigameko zakamuva zokubulawa kwabashushisi uTracy Brown no-Elona Sombulula esifundazweni sase-Eastern Cape.
Oshayasibhamu abane badubule emotweni yomshushisi ngesikhathi umkakhe nendodana eneminyaka engu-12 ubudala besemotweni kanye naye.
Isigameko sokudubula senzeke ngemuva kwehora lokuqala ekuseni ngoMsombuluko kuTorpedo Street, eTiryville, umndeni usubuyela ekhaya.
Okhulumela amaphoyisa uCaptain Andre Beetge uthe umndeni ubumile esangweni lawo ngesikhathi amadoda amane eza kubona.
Ushayasibhamu oyedwa ukhiphe isibhamu wadubula kaningi emotweni ngaphambi kokuba abasolwa abane babaleke.
Ngokumangalisayo, akekho olimele kulokhu kuhlasela. Amaphoyisa aligodlile igama lomshushisi ngezizathu zokuphepha.
INational Prosecuting Authority e-Eastern Cape inqabile ukunikeza eminye imininingwane ngaleli cala.
Okhulumela uMnyango uLuxolo Tyali uthe: “Uphenyo selusesigabeni esibucayi.” Wathembisa isitatimende esigcwele ngokuhamba kwesikhathi.
Emasontweni amabili edlule, umshushisi owaziwayo waseGqeberha uTracy Brown wadutshulwa wabulawa ngaphandle komuzi wakhe e-Young Park.
NgoMbasa(April), kwabulawa umshushisi u-Elona Sombulula waseNkantolo yeMantshi Engcobo.
Amaphoyisa ayaqhubeka nokuthungatha oshayasibhamu abane abenze lesi sigameko.
Umshushisi nomndeni wakhe manje sebevikelwe ngamaphoyisa njengoba uphenyo lusaqhubeka.
Esithombeni esingenhla: iTape yamaphoyisa.
Umthombo wesithombe: Ifayela