UMsawawa osengumbhishobhi manje ubuyela emculweni

Philani Mzila

Eminyakeni emibili edlule, wathengisa imic ukuze athole i-pulpiti kodwa manje uMsawawa usekulungele ukubuyela esiteji.

Manje usebenza ngengoma yamapiano nomngani wakhe wakudala, uVukani Khoza.

UMsawawa, ogama lakhe langempela nguSboniso Dlamini, utshele i-Scrolla.Africa ukuthi ukujabulele kakhulu ukubuya, ngemuva kokugcina ukukhipha ingoma noMzambiya ngowezi-2018.

Uthathe ikhefu emculweni wagxila ebizweni lakhe lenkolo, nokuyilapho anyuselwa esikhundleni sokuba ngumbhishobhi ebandleni lakhe iNomandla Kingdom Church.

Uthe akasoze awulahla umculo.

“Umculo uthando lwami lokuqala,” esho.

“Lesi yisipho engisinikwe nguNkulunkulu. Umculo ubuyingxenye yami kusukela ngidansa ngisengumfana ngaze ngaba umculi ogcwele.”

UMsawawa uhlale ezama ukulinganisa isikhathi sakhe phakathi kothando lwakhe lomculo nokholo lwakhe. Esikhathini esedlule, lokhu bekusho ukuthatha isikhathi eside ukugxila kokukodwa kwalokhu.

Kepha manje akusenjalo.

“NgingumKrestu ozinikele futhi nginguMbhishobhi nginebandla lami kodwa lokho akusho ukuthi kumele ngilahle isipho sami engisinikwe uNkulunkulu,” esho.

“Ngithathe isinqumo sokuthi ngihlanganyele noVukani kwazise sazana kudala eThekwini. Bangazise emkhakheni wezomculo ngesikhathi ngisadansa nabo.”

UMsawawa nethimba lakhe vele sebethwebule ividiyo yomculo futhi isikulungele ukukhishwa.

“Yingoma yamapiano eshisa izikhotha futhi abantu bazoyidansela.”

Uthe ukubuyela emculweni akusho ukuthi ubuyele ezindleleni zakhe zakudala.

NjengomKristu ozelwe kabusha,, uthe kunamagama angasakwazi ukuwasebenzisa ezingomeni zakhe.

UMsawawa waduma ngeminyaka yowezi-1990 esemusha. Umsebenzi wakhe washeshe weqa abanye abaculi bekwaito abadumile njengoMshoza, uTrompies, uMzambiya noMdu Masilela.