Lubhalwe nguLinda Ximba
Umrepha waseThekwini uDuncan ubonge umrepha ongasekho uKiernan “AKA” Forbes — emncoma ngokuphakamisa umsebenzi wakhe.
Esafika ngo-2014, uDuncan waduma ngengoma kaMdu Masilela ethi-Tsiki Tsiki Yo, okuyingoma eyamukelwa ngemfudumalo.
U-AKA naye wahlabeka umxhwele ngaleyo ngoma wabe esebhala ku-Twitter encoma uDuncan owayesafufusa ngomsebenzi wakhe oncomekayo.
“Cabanga nje ungumculi osemusha kule ndima uthole ukunconywa ngu-AKA!”kusho uDuncan.
“Wacela ukuthi senze ingoma. Ngabe sengifaka uProfessor, u-AKA wabe esefaka okwakhe naye kule-remix. Ngeke ngimkhohlwe ngokungeseka nokuphakamisa umculo wami,” kusho uDuncan.
Lo mculi wodumo lwengoma ethi “Ring of Lies” ubekhuluma ne-Scrolla.Africa eceleni emkhulekweni okhethekile ka-AKA noTebello Motsoane obuhlelwe yi-Cultural and Creative Industries Federation of SA. Laba bobabili badutshulwe babulawa ngoLwesihlanu ebusuku bephuma endaweni yokudlela ku-Florida Road.
UDuncan ujoyinwe abaculi baseThekwini abafana noDJ Tira, uDJ Sox, uThobekile Mkhwanazi nabanye abaningi.
Nakuba aziwa njengembangi enkulu ka-AKA, uCassper Nyovest ubhale amazwi athinta inhliziyo ngomrepha ongasekho nomngani wakhe omkhulu uTibz.
Eminyakeni edlule, uCasper no-AKA bebaziwa ngokuklwebhana. Ngelinye ilanga u-AKA waze wafuna ukulungisa ukungezwani kwabo eringini empini yesibhakela yosaziwayo. Kodwa uCassper usekudlise konke lokho.
“Ngidlulisa amazwi enduduzo emindenini kaKiernan kanye noTebello, ozakwethu nabalandeli. Sengathi imiphefumulo yabo ingalala ngokuthula futhi kubungazwe imsebenzi yabo. UNkulunkulu emuhle njalo makabe nani nonke ngalesi sikhathi esibuhlungu,” kusho uCassper ku-Twitter.
Isithombe esingenhla: UDuncan
Umthombo wesithombe sikaDuncan: Twitter