Dylan Bettencourt
ULevan Maisashvili, umqeqeshi oyinhloko webhola lombhoxo wase-Georgia ubuyele ekhaya ekugcineni ngemuva kwezinyanga ezimbili elwa ne-Covid-19 esibhedlela saseNingizimu Afrika.
Ngemuva kohambo olusuka e-Georgia luya eNingizimu Afrika ukuyobhekana namaBhokobhoko ngesikhathi sokuvakasha kwe-British & Irish Lions, lo mqeqeshi oyinhloko utheleleke nge-Covid-19 futhi wazithola esesimeni esibucayi esibhedlela ngoNtulikazi.
UMaisashvili oneminyaka engama-51 ubudala ubebekwe emshinini wokuphefumula esibhedlela i-Netcare Milpark futhi ukwazile ukululama yize amaphaphu akhe abethinteke kakhulu.
Ngesikhathi kungeniswa lo mqeqeshi esibhedlela, isikhulu seqembu sathi: “Welashwa emtholampilo waseNingizimu Afrika osezingeni eliphezulu onemishini yezokwelapha yesimanje yokulapha iziguli ze-Covid”.
Iqembu lombhoxo lase-Georgia bekulindeleke ukuthi lidlale namaBhokobhoko amahlandla amabili njengemidlalo yokuzifudumeza yeqembu laseNingizimu Afrika ngaphambi kokuthi libhekane ne-B & I Lions.
Kodwa-ke, munye kuphela umdlalo odlaliwe njengoba kuqubuke i-Covid-19 kuwo womabili amakhempu okuphoqe ukuthi umdlalo wesibili ukhanselwe.
Okhulumela umbhoxo wase-Georgia uTatia Beriashvili uthe umqeqeshi ubengakagonywa ngokuphelele ngaphambi kokuthi leli qembu lize eNingizimu Afrika.
Ngenkathi esazwela imiphumela yegciwane elinesihluku, uMaisashvili usesendleleni yokululama.
Umthombo wesithombe: @TheMirror