Sizwe Sibiya
Abaculi abangasekho uMpura kanye noKiller Kau, abashone engozini enyantisa igazi eyadlula nemiphefumulo yabantu abayisithupha, bathole izindondo emcimbini wokuqala ngqa wama-South African AmaPiano Music Awards.
Laba baculi ababili baklonyeliswe ngeqhaza labo elimangalisayo emculweni okhula njalo wama-Piano emcimbini obuse-Sandton Convention Centre eGoli ngoMgqibelo.
Abaqokwe kanye nabo abahlonishwayo kubalwa uLady Du, uZuma uReece Madlisa, uMiano kanye noFocalistic – uMpura uwine indondo ye-Best AmaPiano Lyricist/Rapper.
Khonamanjalo, uKiller Kau uwine indondo ye-Best AmaPiano Collaboration ngengoma ethi “AmaNeighbor”, ayicula noMr Jazziq ehlanganisa uReece Madlisa, uZuma, uFocalistic kanye noThackzin.
Kulezi zindondo abaculi baqokiwe futhi bavotelwe umphakathi. Abadle umhlanganiso kwi-Song of the Year bahlomule ngendondo yemali eyizi-R50 000, kwathi abawine kweminye imikhakha bahamba nemali eyizi-R10 000 indondo ngayinye abayiwinile.
Indondo ye-Song of the Year ithathwe uDbn Gogo ngengoma ethi “Khuza Gogo”, ehlanganisa abaculi abaningi okubalwa kubo uMpura ongasekho.