Sizwe Sibiya
Umculi, umlingisi nophinde abe usihlalo weqembu lebhola i-Royal A.M u-Andile Mpisane ugubhe usuku lwakhe lokuzalwa ehlanganisa iminyaka engu-21 ngokunikela ngoR210 000, kubafundi abangu 21, basemanyuvesi.
U-Andile umemezele lokhu kwi-akhawunti yakhe ye-Instagram ngoLwesibili.
Abafundi bazothola u-R10 000 umuntu ngamunye kanti imali izongena esikweletini sabo sango-2021.
“Namuhla ngihlanganisa iminyaka engu-21, okokuqala ngingathanda ukubonga uNkulunkulu ngokungigcina kuze kube manje,” kubhala u-Andile.
“Ukugubha usuku lwami lokuzalwa ngihlanganisa iminyaka engu-21 kulo nyaka sibuyile futhi nenhlangano i-#RoyalAMFeesMustFall. Ngifisa ukubuyisela ngokupha abafundi abangu-21 basemanyuvesi abanezikweletu eziqhubekayo kusukela ngo-2021 ngemali engu-R10 000,” kuqhuba u-Andile.
U-Andile uyindodana yomnikazi we-Royal A.M ophinde abe ngomunye wosomabhizinisi besifazane abacebile kuleli, uShauwn Mkhize. UMaMkhize ungunkosikazi kaSbu Mpisane ongubaba ka-Andile.
Ngomhlaka-21 kuNhlolanja, u-Andile uvule i-Legendz of the Street Tour e-Detroit, eMelika yabaculi abangomrepha abadume umhlaba wonke abafana noRick Ross, uJeezy, uGucci Mane, u-2 Chainz kanye noFabolous.
Ubuso bakhe buphinde bavela ku-Times Square yase-New York City, embhalweni we-Legendz of the Street Tour, lapho abelane khona ngevidiyo yakhe edansa nethimba lakhe.
“Usuku lokuvala lokucela (umfundaze) luzoba ngomhlaka-18 kuNdasa ngo-2022. Bonke abahlomulayo bazomenyezelwa ngoMsombuluko, ngomhlaka-21 kuNdasa ngo-2022,” engeza.
Umthombo wesithombe: Instagram