Menzi Magubane
Umphathi weqembu le-Royal AM, uShauwn Mkhize akanankinga ngokukhipha imali uma ngabe ejabulile.
Futhi kubukeka sengathi ukuwina kweqembu lishaya i-Chiefs ngoMgqibelo kushiye uMkhize ejabulile kakhulu!
Umthombo wangaphakathi eqenjini utshele i-Scrolla.Africa ukuthi abadlali sebezwile ukuthi lesizini ibaphatheleni.
“Ngemuva kokuphela komdlalo wabo neqembu le-Chiefs bathe umphathi weqembu kanye nendodana yakhe usihlalo weqembu bafike egumbini okushintsha kulo bephethe isikhwama esigcwele imali. Bafike banikeza umdlali ngamunye imali eyizi-10,000 zamarandi futhi sizwe ukuthi basazothola enye” kusho umthombo wangaphakathi.
Ngokusho kwe-The Citizen, bonke abadlali bazothola amabhonasi ngokuwina umdlalo wabo neqembu le-Kaizer.
“Lokhu kujabulise abaholi futhi kuyabagqugquzela ukuthi banyuse amasokisi njengoba bethenjiswe ibhonasi enkulu uma ngabe beqhubeka nokuwina.”
I-Scrolla.Africa ithole ukuthi abadlali bazothola ibhonasi enkulu uma bengashaya amaqembu aziwayo njenge-Orlando Pirate kanye neMamelodi Sundowns. Sithole ukuthi uma bengahlula i-Pirate kanye ne-Sundowns umdlali ngamunye uzothola ibhonasi eyizi-100,000 zamarandi.
Noma ngabe abadlali bazowathola la mabhonasi noma cha, kodwa amaqembu kumele acabange kabili uma ngabe ezodlala ne-Royal AM.
Iqembu le-Royal AM lizoba nomdlalo olandelayo we-DSTV Premiership bedlala ne-TS Galaxy ngeSonto ntambama enkundleni yase-Chatsworth eThekwini.
Iqembu libhekwe ukuba liqhubeke nokuwina futhi lingazithola selinamaphoyinti ayi-9 ngemuva kwemidlalo emihlanu. Ngokusho kwesayidi lika-Owen Da Gama, banethemba lokushintsha izinto ngemuva kokuhlulwa i-Soundowns ngo 3-1 ngempelasonto.
Umthombo wesikole:@RoyalAm