Celani Sikhakhane
Ngemuva kokuthi amaphoyisa e-SAPS eshiye isiteshi samaphoyisa eNkandla ngobusuku obubodwa uJacob Zuma aboshwe ngabo, abantu bendawo kudingeke ukuba babhekane nababhikishi abanodlame bebodwa.
Umphakathi waseNkandla, okuyidolobha lalowo owayengumengameli wakuleli uJacob Zuma, bekufanele uchithe ubusuku nemini uvikela isiteshi samaphoyisa kanye nenxanxathela yezitolo kubaphangi ngemuva kokuhoxiswa kokuba khona kwamaphoyisa ngemuva kokuboshwa kukaZuma.
Izitolo zisavaliwe kanti nesiteshi samaphoyisa sendawo sicekelwe phansi ngemuva kokuthi ababhikishi abebesekela uZuma bengene ezakhiweni zamaphoyisa bajikijela ngamatshe.
IMeya yaseNkandla uThami Ntuli utshele i-Scrolla.Africa ukuthi uyamangala ukuthi amaphoyisa ahoxiswa ngoba idolobha lawo, kanye nezinye izindawo ezisondelene nalo lisengcupheni yodlame ngemuva kokuboshwa kukaZuma.
“Bekusobala kwasekuqaleni ukuthi iningi labezokuphepha belidingeka kakhulu eNkandla ukwedlula noma iyiphi enye indawo, ngoba indawo yethu ibiyindawo ebihlaselwa kakhulu ngababhikishi abebethukuthele,” kusho uNtuli.
Uveze ukuthi ngemuva kokuboshwa kukaZuma, abantu basemadolobheni angomakhelwane batheleka bezocekela phansi izitolo nesiteshi samaphoyisa sendawo ngamatshe.
“Ngeshwa, sikwazile ukuthatha isinyathelo ngokushesha ngosizo lwamaphoyisa endawo. Sibe sesinquma ukugada idolobha lethu ubusuku nemini kubandakanya nesiteshi sethu samaphoyisa ngosizo lwamalungu omphakathi nosomabhizinisi,” kusho yena.
UNtuli uphinde wathi izitolo zizoqala kabusha ukusebenza ngoLwesihlanu.
Uphinde wangabaza ukuphathwa kwabantu abaphula imithetho yokhuvethe.
Uthe ngesikhathi ehlangana namalungu omphakathi waseNkandla ewanika amaphasela okudla ngonyaka owedlule ngesikhathi kungumvalelo wokuqala, waboshwa ngamaphoyisa, kodwa abantu abebebuthene eNkandla endaweni kaNxamalala ababoshiwe ngenxa yokwephula imigomo efanayo.