Umphakathi uzibambele mathupha umlisa osolwa ngokudlwengula umshana oneminyaka eyisishiyagalolunye

Lungani Zungu

Indoda eneminyaka engama-43 ibalekile ngemuva kokusinda ngokulambisa ezandleni zabahlali abebethukuthele. Abahlali bezwe ukuthi kuthiwa usekhande umshana wakhe, manje oseneminyaka eyisishiyagalolunye, wamenza isigqila socansi emdlwengula iminyaka emibili.

Le ndoda ishaywe izakhamizi zaseMpangeni ngoLwesihlanu. Umphakathi uphinde waxosha amalungu omndeni wakhe, uwasola ngokumvumela ukuthi adlwengule le ntombazanyana futhi engalubiki udaba emaphoyiseni.

Ukuhlukumezeka kwale ntombazanyana kuvezwe ngemuva kokuthi iKhansela lesigceme uSipho Ntombela azise osonhlalakahle ngezinsolo ezibhekiswe kumalume. Ube eseyiswa kudokotela, okuthe ngokusho kwekhansela, wakuqinisekisa ukuthi udlwengulwe isikhathi eside.

Le ntombazane ithi umalume wayo ubelokhu emdlwengula kusukela ngowezi-2018 eneminyaka eyisikhombisa.

Indlu yomndeni yomlisa yashiswa naye umlisa washaywa.

UNtombela uthe izakhamizi bekufanele zimnikele emaphoyiseni noma ngabe ukwenzile lokhu noma engakwenzanga.

“Akekho umuntu ovunyelwe ukubulala omunye umuntu. Amaphoyisa kumele aphenye.”

Uthe umndeni wentombazane unezinselelo eziningi okubalwa kuzo nezinkinga zemali.

“Kunzima. Angazi noma bebazi yini ukuthi umalume ubedlwengula le ntombazanyana noma cha.”

Umama wentombazane washona kudala, futhi wayehlala nogogo wakhe nezinye izingane zakwabo.

Umndeni wentombazane wenqabile ukukhuluma nabakwa-Scrolla.Africa.

“Sizobhekana nalokhu,” kusho ilungu lomndeni ngaphambi kokuvala ucingo.

Umakhelwane, ongathandanga kudalulwe igama lakhe, uveze ukuthi ukuhlukumezeka kwale ntombazanyana kube nomthelela ngendlela ezihlanganisa ngayo nezinye izingane.

“Besihlale sisola ukuthi uyahlukunyezwa. Uma edlala nezinye izingane ubevele aqale ukukhala,” kusho lo makhelwane.

Ngokwezibalo zobugebengu ezakhishwa nguNgqongqoshe wamaPhoyisa uBheki Cele ngenyanga edlule, bangaphezu kwabayizi-12 218 abantu abadlwengulwe phakathi kukaMfumfu ngoZibandlela ngonyaka odlule.