Lubhalwe nguDoreen Mokgolo
● Abasebenza ngezinto ezigaywa kabusha e-Springs bathole izinto zokuphepha enkampanini yezimayini ngemuva kokucela usizo ekhanseleni.
● Abasebenza ngezinto ezigaywa kabusha emalokishini bafuna amadepho kahulumeni aseduze ukuba anciphise izindleko zabo zokuthutha ukuze bakwazi ukudayisa izinto.
Abasebenza ngezinto ezigaywa kabusha e-Springs bafuna uhulumeni akhe amadepho okugaywa kabusha emalokishini ukuze bonge ezindlekweni zokuthutha.
Inkampani yezimayini inikeze amathuluzi okusebenza kulaba abangu-30 abasebenza ngezinto ezigaywa kabusha nabalimi abancane e-Springs, Ekurhuleni. Umnikelo uqhamuke ngemuva kokuthi ikhansela lendawo uThulane Simelane licele usizo ngo-2023.
Abasebenza ngezinto ezigaywa kabusha bathole amasethi amabili ezingubo zokusebenza, amabhuzu, izibuko zokuphepha namagilavu. Abalimi bathole ithange lamanzi, imbewu namathuluzi okulima.
UNksz Nomusa Nkambule osebenza ngezinto ezigaywa kabusha Ekuthuleni Informal Settlement uthi bachitha imali eningi kwezokuthutha ukuze badayise izinto zabo.
“Isikhwama esikhulu samabhodlela namathini sithola ngaso u-R1 000 kuye ngokuthi singakanani kodwa kumele sikhokhe u-R450 wezokuthutha,” esho.
“Isifiso sami ukuthi kube nedepho kahulumeni yokugaywa kabusha ilokishi ngalinye lapho singeke siphucwe ikhomishini yethu. Sekuyisikhathi sokuthi uhulumeni aqale ukubona le mboni njengebalulekile neneqhaza emnothweni nasemisebenzini yakuleli.”
UNkambule waqala ukusebenza ngezinto ezigaywa kabusha eminyakeni emine edlule ngemuva kokungasebenzi iminyaka eminingi. Umakhelwane wamkhombisa lo msebenzi.
“Umakhelwane oseneminyaka enza lomsebenzi wangimema ukuba ngihlanganyele nabo futhi kusukela lapho umndeni wami awuzange ulale ungadlile,” esho.
“Emphakathini wethu abesifazane yibona abahamba phambili kulo msebenzi; sithembele kule mali ukuze sondle imindeni yethu futhi sifundise izingane zethu.”
Iningi labantu abathole iminikelo lihlala emijondolo lapho imisebenzi iyindlala khona, kusho uSimelane.
“Abaningi sebephendukele kulo msebenzi futhi abanawo amathuluzi okusebenza; abanazo izifonyo, izicathulo zokuzivikela nezigqoko zokuzivikela ekushiseni okushisayo nokubenza babonakale ebusuku,” esho.
“Umnikelo uzokwenza umsebenzi wabo ube lula futhi ukwazi ukubekezeleleka.”
Esithombeni esingenhla: Abasebenza ngezinto ezigaywe kabusha.
Umthombo: Sithunyelwe