Lubhalwe nguThathe Msimango
Umsubathi wakuleli webanga eliphakathi uRyan Mphahlele ushisise inkundla ngokugijima isikhathi esimangalisayo enkundleni yezemidlalo i-Green Point eKapa ngoMsombuluko ebusuku.
Lo msubathi (24) obengenele umjaho we-Cape Miller ugijime isikhathi sakhe esisha esingcono kakhulu esingu-3:32:90 ebangeni lika-1,500m ngaphandle nje kwerekhodi lesizwe elibekwe uJohan Cronje e-Italy.
“Ukugijima kahle phambi kozakwethu basekhaya kungijabulise kakhulu,” kusho uMphahlele obejabule.
Ubhekane nenselelo ebivela kuTshepo Tshite ophume isibili ngesikhathi esihle esingu-3:33:02.
UMphahlele uthe uTshite nguye omgqugquzele ukuthi enze konke okusemandleni akhe ukuwina lo mjaho.
“Unginikeze umqhudelwano omuhle engiwamukela ngezandla zombili. Bengingeke ngikwazi ukugijima lesi sikhathi ngaphandle kokuthi ngibe naye ezonikela ngakho konke emjahweni.”
Bobabili abasubathi baphumelele ukuhlungela ukuyoqhudelana kwi-World Athletics Championship njengoba begijime isikhathi esingaphansi kuka-3:34:00. Lo mqhudelwano uzoba ngoNcwaba e-Hungary.
Umqeqeshi kaMphahlele u-Elvis Khoza lokhu aqala ukumqeqesha kusukela eneminyaka engu-11.
“Ngiyaziqhenya ngenqubekela phambili yakhe,” kusho uKhoza.
“Ulokhu ethuthuka njalo uma egijima. Sisendleleni efanele yokufinyelela kwirekhodi lesizwe.”
UMphahlele usezogxila emqhudelwaneni we-Adidas Invitation ozoba e-Germany ngomhlaka-29 kuMbasa lapho azongenela khona umjaho ka-5 000m.
Esithombeni esingenhla: URyan Mphahlele
Umthombo wesithombe: Sithunyelwe