Linda Ximba
UHekkie Budler wakuleli uzobhekana no-Elwin Soto belwela isicoco se-World Boxing Council (WBC) se-junior flyweight e-Palenque del FEX kusasa.
UBudler ubekwe endaweni yokuqala kanti imbangi yakhe yase-Mexico ibekwe endaweni yesithathu.
Bobabili laba bashayisibhakela bake baphatha amabhande omqhudelwano womhlaba kwi-junior flyweight kanti uSoto oneminyaka engu-25 ubudala (19-2; 13) ubenempi yakhe yokugcina ngomhlaka-16 kuMfumfu nyakenye. Kuleyo mpi ulahlekelwe ibhande le-WBO light flyweight ku-Puerto Rican Jonathan Gonzalez (24-3-1).
UBudler (33-4; 10) ohlanganise iminyaka engu-34 ngomhlaka-18 kuNhlaba ungumpetha wesibhakela wakuleli. Lude uhlu lwakhe lwezicoco asenazo okubalwa i-International Boxing Organisation (i-IBO) All-Africa, i-IBO junior flyweight ne-IBO strawweight, i-WBA interim minimumweight, i-WBA minimumweight, i-WBA “super” minimumweight, i-WBA Pan African junior flyweight, i-IBO light flyweight ne-WBC silver light flyweight belts.
Uphinde waklonyeliswa ngebhande le-The Ring Championship futhi ungowesibili wakuleli ukuhlonishwa ngaleli bhande kanti uVic Toweel nguyena umpetha womhlaba wakuleli, owathola leli bhande ngo-1950.
Kubukeka sengathi izinto eziningi zimelene noBudler njengeminyaka kanye nokulwa ezweni lakubo kaSoto okuyinto engamfakela inselelo.
UBudler oqeqeshwa nguCollin Nathan ugcine ukulwa ngoNhlaba eGoli wanqoba ibhande le-WBC silver light flyweight ehlula uJonathan Almacen.
Lo mshayisibhakela onezinwele ezimfishane waseGoli uthe ngaphambi kwempi eshisa izikhotha:
“Ngizobhekana neqhawe elinamandla, kodwa sengihambe ibanga elide futhi nginesiqiniseko sokuthi ngizowina.
Ngiyiqhawe eringini futhi ngiza nokuzilungiselela ngoba ngifuna ukuthola ilungelo lokungenela umqhudelwano womhlaba we-WBC.
“USoto ungumshayisibhakela onesibindi, kodwa siyakwazi okumele sikwenze ukuze simnqobe. Ngiwathemba ngokugcwele amajaji afakwe i-World Boxing Council kule mpi futhi ngiyazi ukuthi ekugcineni ngizoyinqoba lempi.”