Lubhalwe nguCelani Sikhakhane
UNgqongqoshe weMfundo eyisiSekelo uNkk Angie Motshekga usethume ithimba elizongenelela ohlelweni lokuphakela ukudla ezikoleni zaKwaZulu-Natal.
Lolu hlelo lushiye inqwaba yabafundi bengenakho ukudla ngemuva kokuthi ithenda ka-R2 billion inikwe usomabhizinisi osebenzisana nobuholi be-ANC.
Uhlangothi lwe-ANC oluthathe izintambo kuhulumeni waKwaZulu-Natal luguqule uhlelo lokuphakela izikole osekuneminyaka lusebenza.
Lukhiphe abahlinzeki abanamava lafaka inkampani engaziwa i-Pacina Retail Pty Ltd enikezwe ithenda ka-R2 billion.
Le nkampani ayinazo izindawo zokugcina izimpahla noma inethiwekhi ethembekile yokusabalalisa ukudla ezikoleni kuso sonke isifundazwe.
Udumo lwayo ukuthi ngekaSabelo Zungu we-ANC ongumfowabo wesikhulu samaZulu FC uSandile Zungu.
USandile Zungu udume kakhulu ngokuthi usondelene kakhulu nowayengumengameli wezwe uJacob Zuma.
Amaqembu aphikisayo akhala ngokuthi ithenda yanikezwa inkampani yaseGoli, i-Pacina Retail.
NgoLwesihlanu, isiteshi sikamabonakude sasendaweni i-1 KZN TV siveze ukuthi ithenda yanikezwa i-Pacina Pty Ltd ephethwe uZungu nyakenye.
Ithenda idale uthuthuva nentukuthelo njengoba osonkontileka bekhala ngokuthi baphoqeleke ukuthi bathenge ukudla kwi-Pacina Retail kuphela.
Le nkampani isolwa ngokwehluleka ukunikeza osonkontileka basezikoleni ezingaphezu kuka-5 000 zasemakhaya nasemalokishini aKwaZulu-Natal ngokubanika ukudla okuthatha usuku olulodwa esikhundleni sezinsuku eziyisishiyagalombili.
Iphinde isolwe ngokuhlinzeka ngokudla okuphelelwe isikhathi – nokuyinto edale impi phakathi kosonkontileka nothishomkhulu bezikole.
Lokhu sekuholele ekutheni abanye othishomkhulu bacele othisha babo ukuthi bakhiphe u-R100 umuntu ngamunye ukuze isikole sithengele izingane ukudla.
NgoLwesine, kusuke umsindo esiShayamthetho saKwaZulu-Natal ngesikhathi uMtomuhle Khawula we-IFP eveza ukuthi uMnyango wezeMfundo uyakufihla ukuthi ithenda yanikezwa uZungu.
Usihlalo we-ANC esifundazweni uMnu Sboniso Duma uhlasele iMeya ye-DA yaseMngeni uMnu Chris Pappas wamsola ngokucwasa ngokwebala ngesikhathi ebiza abaholi be-ANC ngamaxoxo antshontsha imali yokudla kwezikole.
Le nkinga idale isiphithiphithi ezinhlakeni ze-ANC njengoba abanye bethi uNgqongqoshe wezeMfundo uMbali Fraser axoshwe.
I-ANCYL isinxuse izinhlaka zayo ukuthi zihambele zonke izikole zaKwaZulu-Natal ukuze kubhekwe ukuthi ukudla okulethiwe akuphelelwe yini isikhathi.
NgoLwesihlanu, uSihlalo we-IFP esifundazweni uMnu Thami Ntuli uhambise ukudla kwesinye sezikole zasemalokishini aseThekwini eLindelani njengoba ezinikele ukuthi uzosinika ukudla.
Esithombeni esingenhla: Umphathi we-AmaZulu FC uSandile Zungu
Umthombo wesithombe: SNL24