Lubhalwe nguPalesa Matlala
Umnikazi wendawo yokucima ukoma eSoweto uthi udayisa utshwala bomgunyathi ngamanani aphansi futhi wenza inzuzo elinganiselwa ku-R30 000 nyanga zonke ngalo mkhuba ongekho emthethweni.
Amakhasimende aseDiepkloof angakwazi ukuthenga i-six pack ngemali engaphansi kuka-R70 uma kuqhathaniswa nezitolo, kodwa abanye bathi ukunambitheka akukuhle futhi besaba ukuthi kungase kubagulise.
Umnikazi wendawo yokucima ukoma eSoweto uvumile ukuthi uthenga aphinde adayise utshwala bomgunyathi ukuze anqobe izimbangi zakhe futhi agcine ibhizinisi lakhe liphila.
UZaks onethaveni eDiepkloof, uthi lezi ziphuzo uzidayisa ngamanani aphansi ngoba abantu badonsa kanzima ngenxa yokumba eqolo kwempilo. Ukholelwa ukuthi usiza amakhasimende asafuna ukujabulela isiphuzo kodwa angakwazi ukukhokhela amanani ezitolo.
“Utshwala ngibubeka ngentengo ephansi futhi ngibudayisa ngentengo ephansi, abantu bafuna ukuphuza kodwa hhayi ngemali ekhuphukayo,” kusho uZaks.
Kodwa amanye amakhasimende akhathazekile.
UPule Mashego (46) waseSoweto, uthe waqala ukusola ngesikhathi unkosikazi wakhe eqala ukuthenga isiphuzo sakhe asithandayo endaweni yokucima ukoma.
“Ithaveni igcwala kakhulu mihla namalanga, ungathenga i-six pack kabhiya ngo-R70 uthe lokhu kwamsolisa.
NgokukaMashego, “ukunambitheka akufani”.
Kuphika uZaks. Ugcizelela ukuthi ukunambitheka kwawo akufani neziphuzo ezidayiswa ezitolo.
Ezindaweni eziningi, i-six pack ye-cider ibiza cishe u-R130, kuye ngokuthi hlobo luni. Ethaveni yakwaZaks, idayisa ngo-R100.
Ubhiya ongu-750ml ngokuvamile ubiza u-R25. UZaks uyidayisa ngo-R20.
Nakuba amathaveni amaningi enza imali yawo eningi ekupheleni kwenyanga, uZaks uthi wenza inzuzo eqhubekayo masonto onke. Uthi uhola cishe u-R30 000 ngenyanga.
Ucwaningo luveza ukuthi utshwala bomgunyathi buvamise ukwenziwa ngokungemthetho ezindaweni ezidayisa izinto ezingenazo izincwadi noma emakhaya abantu. Ibe isihlanganiswa ukuze ibukeke njengemikhiqizo eyaziwa kakhulu.
Asikho isiqinisekiso sokuthi yini engaphakathi kula mabhodlela.
Ochwepheshe baxwayisa ngokuthi utshwala bomgunyathi bungaba yingozi enkulu empilweni futhi bungase buholele ngisho nasekufeni.
Esithombeni esingenhla: Amaphoyisa agasele endaweni edayisa utshwala eSedibeng District athola utshwala bomgunyathi ekuqaleni kukaNhlolanja.
Umthombo wesithombe: SAPS