Umngani womndeni usolwa ngokubulala ngesihluku elinye lamalungu

Doreen Mokgolo

Ehleli kumatilasi, umama osisizini ozilele ingane yakhe uLerato Magoete oneminyaka eyi-15 uthe indodakazi yakhe ibulawe njengesilwane.

“Nginenkinga yokuvimba inkumbulo yesidumbu sakhe esilele ezihlahleni,” kusho uSylvia Magoete.

“Ushone kabuhlungu, lokhu kuzongihlupha impilo yami yonke.”

Isidumbu sikaLerato sitholwe ngoMgqibelo ekuseni. Ubedlwenguliwe, wabulawa futhi ubenamanxeba avulekile. Bekubekwe itshe elikhulu emilenzeni yakhe kanye nelinye eceleni kwekhanda lakhe.

Umndeni wakhe kanye nomakhelwane basola ukuthi umngani womndeni uyena obhekene necala lokubulawa kwakhe, ngemuva kokuthi umakhelwane etshele umndeni ukuthi wabona intombazane ihamba nomsolwa ibheke esigangeni esivulekile.

Ubabekazi u-Agnes Magoete, ukuqinisekisile ku-Scrolla.Africa ukuthi emasontweni amabili edlule umufi wamthululela isifuba ngokuthi umsolwa wayethanda ukumthinta ngendlela eyayimenza angakhululeki.

Umufi kubikwe ukuthi ulahleke ngoLwesine. Umphakathi ujoyine ukuthungatha kodwa isidumbu sakhe satholwa yiqulu lamakholwa ngoMgqibelo esigangeni esivulekile eduze kwedamu esigabeni sase-Masechaba e-Duduza, e-Kurhuleni.

Umndeni uphuthume endaweni yesigameko kwathi ubabekazi wakhe uBafedile Mofekeng, wasikhomba isidumbu.

NgeSonto ntambama, iqulu labantu ebelithukuthele lihlasele lo mngani osolwa ngumndeni waze watakulwa ngamaphoyisa.

Okhulumela amaphoyisa akwaDuduza, uSayitsheni uHarry Manaka, ukuqinisekisile ukuthi baphenya icala lokubulala. Akekho osaboshiwe kanti uphenyo lusaqhubeka.

Umsolwa ususiwe elokishini ukuze amaphoyisa aqhubeke nophenyo.