Moyahabo Mabeba
Umndeni kaChisimango Gumbo owabulawa usekude ukuhlangana nesidumbu sakhe.
Umndeni kaChisimango uyehluleka ukuthutha amathambo akhe uwayise esigodini sase-Museva e-Chivi, esifundazweni sase-Masvingo e-Zimbabwe.
UChisimango uphakathi kwabesifazane abayisikhombisa okusolwa ukuthi babulawa ngumdlwenguli ophinde abe ngumbulali uThemba Dube, owalahla izidumbu zabo emaphethelweni ase-Polokwane e-Limpopo.
Okhulumela umndeni uTanaka Chigohwi uthe bebelokhu belinde imiphumela yolibofuzo ukuze kubonakale ukuthi umufi ungumzala wabo yini.
“Ngemuva kokuthi ehlonzwe, baphinde babhekana nenye inkinga. Kufanele sibhekane neqiniso lezindleko zokuthutha nezomngcwabo”.
UTanaka uthe imali eshibhe kakhulu abayithole kubangcwabi e-Polokwane ngu-R9,700 – okuyimali abadonsa kanzima ukuyiqoqa.
“Siphuma emndenini onhlwempu. Yingakho kwadingeka ukuthi mina noChisimango siye eNingizimu Afrika siyofuna amadlelo aluhlaza. Selokhu umyeni kaChisimango ashona ngo-2005, ubezabalaza ukukhulisa izingane zakhe ezimbili,” esho.
UChisimango wanyamalala egumbini ayeqashe kulo elokishini lase-Seshego, ngaphandle kwase-Polokwane, ngoNcwaba nyakenye.
Amathambo akhe adedelwe kanye nakaSarah Mothiba (42), uMoleboheng Mothibeli (34), uKhomotso Makhura (41), kanye noSanah Senyatsi (34), asebengcwatshiwe.
UDube ubhekene namacala ayisikhombisa okuthumba nokubulala, ukudlwengula, ukuphula umthetho kanye nokuphula umthetho wabaphuma emazweni angaphandle. Owase-Zimbabwe ubekulelizwe ngokungekho emthethweni.
Indlela ayesebenza ngayo kwakuwukuheha abesifazane ngesithembiso somsebenzi.
Okhulumela amaphoyisa ase-Limpopo uBrigadier Motlafela Mojapelo uthe akuwona umsebenzi wamaphoyisa ukubuyisela abashonile emazweni akubo.
“Sesiyifezile indima yethu ngokwenza imiphumela yolibofuzo nokuthi sidlulisele amathambo emindenini. Mayelana nokuthuthwa kwezinsalela zoshonile, kuwumthwalo wemindeni”.
Umndeni utshele i-Scrolla.Africa ukuthi ucela uxhaso lwezimali ukuze uhambise uChisimango endaweni yakhe yokugcina.
Ngesonto eledlule, uDube wasabisa intatheli yakwa-Scrolla.Africa ngesikhathi umsolwa evele eNkantolo yeMantshi yase-Seshego.