Umndeni ufuna ubulungiswa ngomfana obulewe yizinja

Lungani Zungu

Bekufanele kube uhambo olulula nje lokuya esitolo ukuyothenga amafutha okupheka, kodwa kwagcina kuphenduke usizi ngesikhathi uThabiso Zulu oneminyaka eyisishiyagalolunye elunywa futhi ebulawa yizinja ezine.

Uyise, uDayalan Kanniappen wase-Verulam eThekwini utshele abakwa-Scrolla.Africa ukuthi uThabiso uhlaselwe izinja zohlobo lwe-Rottweiler ezimbili, enye yohlobo lwe-German Shepherd kanye nenye yohlobo olungaziwa ngoLwesine.

“Izinja bezingayidedeli inyama yendodana yami yize ibikhala. Ulwile, kodwa izinja bezilokhu zimluma,” kusho ubaba okhathazekile.

“Indodana yami ibingakwazi ukunyakaza. Ubekhala engalawuleki. Ukubona lokhu okwenzeke kwindodana yami kuyangikhathaza. Ngisho nokukhuluma ngakho kubuhlungu.”

Omakhelwane baphuthume ukuyosiza uThabiso balwa nezinja, kodwa ukuhlaselwa kuqhubeke kwaze kwasiza umuntu obedlula ngendlela odubule wabulala zonke izinja ezine.

Ukopha kakhulu ngenxa yesilonda esivulekile esiswini kanye nengalo elimele uThabiso uphuthunyiswe esibhedlela sendawo lapho afike washonela khona kamuva.

UDayalan uthe, ufuna kuboshwe umnikazi walezi zinja, okuthiwa ubalekile endaweni nomndeni wakhe.

“Ube nobudedengu ngezinja, manje indodana yami ishonile. Ngifuna akukhokhele lokhu. Kumele ajeziswe.”

Unina kaThabiso uNomusa ubengazimisele ngokukhuluma ngokushona kwendodana yakhe okubuhlungu.

Umthetho we-Animal Matters Amendment Act uthi, noma yimuphi umuntu onobudedengu ngesilwane obudale ukulimala komunye umuntu unecala lokwephula umthetho futhi uma etholwa enecala uzokhokha inhlawulo noma aboshwe iminyaka engafinyelela kwemibili.

Uphiko lwe-SAPS Reaction Unit luqinisekise isigameko.

Okhulumela amaphoyisa esifundazweni uKaputeni uThembeka Mbele usiqinisekisile lesi sigameko, wathi amaphoyisa aphenya icala lokubulala. Akukaboshwa muntu ngalesi sigameko.