Umndeni othandwa kakhulu kuleli ohlelweni lwakumabonakude 

Lubhalwe nguLinda Ximba

Yize usebhizinisini lezokungcebeleka, umndeni wakwaNgcobo ukhombise isithombe esihle somndeni ophelele kanye nobumbene kanti uzithole usuthandwa ngabantu abaningi bakuleli.

Uhlelo olusha olusihloko esithi Ofuze oluzokhonjiswa ku-Mzansi Magic luzoveza uBheki “Ihhashi Elimhlophe” noLinah Ngcobo kanye nezingane zabo uNathi Ngcobo, uNtombee Mzolo, uJabu Ngcobo kanye noVusiwe Ngcobo ezindlini zokuphumula zababukeli.

Lesi siteshi sithe kulolu hlelo izingane zakwaNgcobo zizama ukwephula imithetho nemingcele ebekelwe yona ngabazali bazo abanomthetho oqinile.

“Eminyakeni edlule sibone abakwaNgcobo behlobisa omabonakude bethu njengomndeni ophelele waseMzansi, kodwa njengoba izingane sezikhulile kuyacaca ukuthi konke lokho okucwebezelayo akulona igolide,” kusho uShirley Adonisi onguMqondisi we-Local Entertainment Channels kwa-M-Net.

“Siyethemba ukuthi ezinye zezindaba ezihloliwe zizohambisana nabaningi abazobe bebukele.”

Kulolu hlelo ababukeli bengalindela ukubona izibulo uNathi onemibono yakhe, ongubaba wezingane ezine ozimisele ngokuzakhela eyakhe indlela ngaphandle kwebhizinisi lomndeni njengoba ezama ukuphatha umndeni wakhe ngendlela yakhe.

Uzobe ehambisana nendodakazi yokuqala; umlingisi ophinde abe umsakazi kumabonakude uNtombee Mzolo kanti indima yakhe emndenini ukuba umxazululi.

Umama ophinde abe unkosikazi ubelokhu elwa nezinhlungu selokhu ashonelwa izingane zakhe ezimbili.

UJabu ongowesithathu ngokuzalwa ungubaba onezindaba zakhe zokuzibophezela – ezithusa kakhulu abazali bakhe.

Usefuna ukuphuma ekhaya kodwa uyenqaba ukushada ngokomthetho obekwe kuzo zonke izingane zakwaNgcobo.

Uthunjana uVusiwe uhlezi emamatheka kodwa unemfihlo engaziwa muntu emndenini.

Ebudlelwaneni besikhathi eside nomlingani wakhe, ingabe ekugcineni uzomcela amshade ukuze amkhulule emthethweni wokuhlala nabazali bakhe – futhi ingabe imfihlo yakhe izogcina iphumele obala?

Abazali babo badume kakhulu kumaskandi kanti selokhu bangena emculweni ekuqaleni kwango-1980.

Uhlelo Ofuze luzokhonjiswa okokuqala ngomhlaka-19 kuMasingana.

Esithombeni esingenhla: Ofuze

Umthombo wesithombe: Sithunyelwe

Izihloko zakamuva