Lubhalwe ngu-Everson Luhanga
UKhomishana wamaphoyisa uMkhwanazi usize ekwenzeni isivumelwano sokuthula phakathi kwabashayeli bamatekisi nabashayeli be-e-hailing KwaDabeka.
Impumelelo yakamuva yengeza esithunzini sikaMkhwanazi sokukhuluma mathupha ukuze aqede udlame lwezokuthutha.
UKhomishana wamaphoyisa KwaZulu-Natal, uLieutenant-General Nhlanhla Mkhwanazi, usesize ekwenzeni esinye isivumelwano sokuthula, kulokhu kuqedwe izimpi ezinodlame phakathi kwabashayeli bamatekisi nabashayeli be-e-hailing KwaDabeka.
Lesi sivumelwano kufinyelelwe kusona emhlanganweni obusesiteshini samaphoyisa KwaDabeka obuhlanganisa iKwaDabeka neClermont Taxi Association, iKwaZulu-Natal E-hailing Council kanye nezinhlaka ezahlukene zomthetho.
Womabili la maqembu avumile ukusebenzisana, abambe abashayeli abangekho emthethweni, akhuphule umthetho futhi abambe izivimbamgwaqo ngokuhlanganyela.
Baphinde bazibophezela ngokwazisa abashayeli imithetho emisha ye-e-hailing ngaphansi kweNational Land Transport Act.
UNgqongqoshe wezokuThutha nokuHlaliswa kwaBantu uMnuz Siboniso Duma usamukele isivumelwano wabonga uMkhwanazi ngokuthumela uphiko lweNational Intervention Unit kule ndawo.
“Isivumelwano sikhombise ukuzibophezela kwazo zombili izinhlangothi ekugcineni ezokuthutha umphakathi ziphephile futhi zizinzile,” kusho uDuma.
Lesi ngesakamuva sochungechungeni lwezingxoxo eziyimpumelelo zikaMkhwanazi, osezakhele udumo ngokuxoxa mathupha nabezokuthutha ukuze aqede imibango enodlame.
NgoNhlaba wango-2024, wakwazi ukwenza abanikazi bamatekisi ababhikishayo ukuthi bavule imigwaqo evaliwe yaseWestville ngemuva kwezingxoxo ezimfushane ngasenxanxatheleni yezitolo iPavilion.
Abanikazi bamatekisi bavala umgwaqo uMngeni no-Argyle no-N3 bekhala “ngokujeziswa ngokweqile” ngamaphoyisa kamasipala.
UMkhwanazi utheleke endaweni yesigameko wakhuluma ngqo nabanikazi bamatekisi ebacela ukuthi bavule imigwaqo bathembise nokuhlela umhlangano noMnyango wezokuThutha esifundazweni.
“Inkinga ukuthi senivale imigwaqo abantu sebevalelekile,” esho kubona ngalesiya sikhathi.
“Uma nithatha isinqumo sokulwa namaphoyisa makucace ukuthi niqala impi. Asizimisele ngokulwa nani.”
Uhulumeni uthembise ukwesekwa abashayeli bamatekisi nabe e-hailing ngohlelo lwezindlu, okuhlanganisa nohlelo lwe-First Home Buyer programme lwemindeni ehola phakathi kuka-R3,000 no-R22,000 ngenyanga.
UDuma uthe uhulumeni uzosebenza nakwezinye izingxenye zeKwaZulu-Natal lapho izigebengu zigaqele abashayeli.
Uxwayise ngokuthi akukho okumele kuvimbe ukuthula nokuhleleka esifundazweni.
Esithombeni esingenhla: UNgqongqoshe wezokuThutha nokuHlaliswa kwaBantu uSiboniso Duma kanye noKhomishana wamaPhoyisa uLieutenant General Nhlanhla Mkhwanazi erenki yamatekisi KwaDabeka.
Umthombo wesithombe: UMnyango wezokuThutha KwaZulu-Natal