Sizwe Sibiya
Umlingisi uMapaseka Koetle-Nyokong nowayenguMiss SA uBokang Montjane-Tshabalala basohambweni lokuhamba izwe ngenhloso yokulwa nezindlu zangasese ezingahlanzekile zabesifazane.
Ngophawu lokuhlanza izindlu zangasese i-Harpic osaziwayo ababili basebenzisa amandla abo ukumela ushintsho emphakathini ukuze kuliwe nokungakhucululwa kwendle kanye nezindlu zangasese ezingaphephile zomphakathi nezisetshenziswa abesifazane.
“Lezi izinkinga okumele sibhekane nazo njengabantu besifazane ngaso sonke isikhathi uma kumele sisebenzise izindlu zangasese zomphakathi,” kusho uKoetle-Nyokong ebeka ithishu eduze kwesihlalo sendlu yangasese kuvidiyo efakwe ekhasini lakhe le-Instagram.
“Abesifazane abaningi baseNingizimu Afrika bayesaba ukusebenzisa izindlu zangasese zomphakathi.
Ezingahlanzekile, ezingaphephile futhi ezingafanele ukusetshenziswa ngabesifazane,” kusho lo mlingisi odlala indawo kaDintle kwi-Scandal nophinde avele kwifilimi enesihloko esithi Losing Lerato yaseNingizimu Afrika.
UMontjane-Tshabalala uqokwe njengoMiss SA ngonyaka ka-2010 futhi ushade nomdlali webhola odumile uSimphiwe Tshabalala.
Ngokuhlangene laba besifazane ababili benza umehluko ngohlelo lwe-Harpic Hygiene For Her.
“Izolo kanye sihambisana ne-Harpic sinikele ngezindlu zangasese ezinhlanu e-Klipfontein!” kusho uMontjane-Tshabalala naye owaqokwa njengoMiss World Africa emqhudelwaneni kaMiss World ngo-2011. Uveze isithombe sakhe noSimphiwe Tshabalala e-Klipfontein eGoli, lapho bekwenziwa khona lolu hlelo.
Umthombo wesithombe:Instagram