Menzi Magubane
Iqophe umlando ngokuba iqembu lokuqala i-Mamelodi Sundowns ukunqoba isicoco se-DStv Premiership amahlandla amahlanu kulandelana.
I-Sundowns ibibhekene ne-Cape Town City ngoLwesithathu ebusuku njengoba umdlalo uphele bentanganye.
Abalandeli be-yellow nation bebekhona enkundleni yase-Loftus bezobungaza umlando neqembu labo.
Leli phuzu lenze i-Sundowns yaba namaphuzu angu-58 esephelele kanti leli qembu elizinze ePitoli selizojaha amaphuzu angu-70 njengoba isizini iphela.
I-Sundowns beyazi ukuthi iphuzu lizokwanela ukunqoba isicoco futhi idlale ngokukhulu ukucophelela ayizange ijuluke umdlalo wonke.
Ngesonto eledlule i-Sundowns iphoxe abalandeli bayo ngemuva kokusheshe ikhishwe kowe-CAF Champions League ikhishwa i-Petro de Luanda yase-Angola ebekwe endaweni esezansi.
Khonamanjalo i-Orlando Pirates inyukele endaweni yesine ngemuva kokubanjwa ekhaya i-Chippa United.
I-Pirates ibisendaweni yesihlanu ngaphambi kokuthi idlale ngokulingana ne-Chippa enkundleni i-Orlando ngoLwesithathu ebusuku.
Idlale ngokulingana nezimbangi zayo zase-Soweto i-Kaizer Chiefs ehlulwe ngamagoli amabili kwelilodwa ihlulwa i-Golden Arrows.
Lona bekuwumdlalo waMakhosi ngemuva kokuthi engazange ayihloniphe imidlalo yokuqala ne-Arrows ngoZibandlela ngenxa yokubheduka kwe-Covid-19 e-Naturena.
Njengoba sekusele imidlalo emine nje kuphela umjaho wokugcina we-Champions League phakathi kwe-Royal AM, i-Cape Town City ne-Orlando Pirates uzofinyelela esicongweni.
Umthombo wesithombe: @SoccerLaduma