Celani Sikhakhane
UDJ Tira, owake waba umsekeli odumile we-ANC, uselifulathele iqembu elibusayo.
Manje useqashwe yi-IFP ukuthi azocula emicimbini yayo yokukhankasela ukhetho.
Lo mdidiyeli wezingoma, ogama lakhe langempela nguMthokozisi Khathi, waba sematheni ngowezi-2016 ngemuva kokunqaba imali eyizi-R60 000 ukuthi bacule neBig Nuz emcimbini wokukhankasela i-IFP.
Ngemuva kwalo mcimbi uTira wakubeka kwacaca ukuthi uthembekile ku-ANC wathi akavumelekile nokucula egameni lamanye amaqembu epolitiki.
Ngemuva kweminyaka emihlanu lo DJ ubonakale ecula emkhankasweni we-IFP.
Uyichithile indaba yokuthi useyilungu le-IFP. Uthi kuyisinqumo sebhizinisi nje.
“Ngingusomabhizinisi oqeqeshiwe okusho ukuthi ngingacula kunoma yiliphi iqembu lepolitiki ngoba ekugcineni ngiyayidinga imali,” kusho uTira etshela i-Scrolla.Africa.
UTira, ongumsunguli wenkampani eqopha umlando i-Afrotainment, uthole udumo ngemuva kokukhiqiza umculo wabaculi abafana neQwabe Twins, iBig Nuz, uTipcee, uNtencane, iDistruction Boys kanye noDladla Mshunqisi.
Abalandeli bakaDJ bahlukene phakathi ngokushintsha isinqumo sakhe. Nakuba abanye beye basekela ilungelo lakhe lokuziphilisa, abanye baye bamgxeka ngokuvumela imali ukuba iphazamise izinkolelo zakhe.