Celani Sikhakhane
Indoda ehlukane nengoduso yayo ngemuva kokuthi ikhiphe ilobolo lika-R70 000 ishaqe zonke izinkomo nezimbuzi esibayeni sikamukhwe wayo.
Owesilisa waseSishwili Olundi uthathe izinyathelo ezinqala ngemuva kokuthi umukhwe wakhe ehluleke ukubuyisa ilobolo lakhe njengoba ebethembisile ngoLwesine.
Ngemuva kokwedlula komnqamulajuqu wangoLwesine, uNqaba Mthenjana (29), uphindele ekhweni lakhe kwaNgubane esigodini saseNhlophenkulu eyofuna ilobolo lakhe kuSunnyboy Ngubane.
Kodwa ufice kungekho muntu.
“Akazange aziphendule izingcingo zami. Uphinda lokho akwenza ekuqaleni. Namuhla ngikwazile ukuthola izinkomo ezimbili nezimbuzi ezintathu ezimithi. Ngizozidayisa bese ngidlulisela udaba lwami enkantolo yamacala amancane ukuze akhokhe imali esele,” kusho uMthenjana etshela i-Scrolla.Africa.
Omakhelwane bebebukela besemizini yabo ngesikhathi uMthenjana elayisha imfuyo yakwaNgubane esele emotweni yakhe.
Nakulokhu uMthenjana ubephelezelwa ngamaphoyisa ngesikhathi eya kwaNgubane ngoLwesine.
I-Scrolla.Africa sishayele uNgubane ucingo ukuze aphawule kodwa uthe ngeke akwazi ukuphawula.