Umkhosi womhlanga uzoqhubeka njengenjwayelo

Celani Sikhakhane

ISilo samaZulu uMisuzulu kaZwelithini unqume ukuqhubeka nomkhosi womhlanga oba minyaka yonke kule mpelasonto yize kunokwesaba kokuchitheka kwegazi okuhlongozwa amavukelambuso asebukhosini.

NgoLwesibili okhulumela iSilo uMntwana uThulani waseGazini utshele i-Scrolla.Africa ukuthi azikho izinsongo ezizovimba iSilo ukuthi sisingathe umkhosi womhlanga ozoba esigodlweni saseNyokeni kule mpelasonto.

Umcimbi osekunesikhathi ulindiwe uvamise ukwenziwa minyaka yonke kodwa uye wahlehliswa ngo-2020 nango-2021 ngenxa yobhubhane.

NgoMsombuluko i-Scrolla.Africa sibike ukuthi uMntwana uMxolisi kaBhekuzulu oweseka uMntwana uSimakade ophikisa iSilo esihlalweni sobukhosi, ubhalele uNdunankulu uNomusa Dube-Ncube exwayisa “ngokuchitheka kwegazi” emkhosini womhlanga.

Ukugwema izinxushunxushu, uxwayise ngokuthi uNdunankulu kumele amise umcimbi waminyaka yonke noma ashintshe indawo yasesigodlweni saseNyokeni lapho obuhlezi wenziwa khona iminyaka engu-37.

Uxwayise ngokuthi ngeke bavume ukuthi iSilo senze lo mcimbi eNyokeni ngoba abamthatha njengeSilo futhi njengamanje uMntwana uSimakade ohlala kuleso sigodlo.

Uthe iSilo kumele senzele lo mcimbi esigodlweni saKwaKhangelamankengana.

UMntwana uThulani uthe ngenxa yale ncwadi uhulumeni kumele ahlinzeke ngezokuphepha ukuze kugwenywe udlame.

“Angikubeke kucace ukuthi konke kuhamba kahle kulo mcimbi womkhosi womhlanga futhi uzoba esigodlweni saseNyokeni njengenjwayelo,” esho.

“Lo mcimbi uhlezi unamaphoyisa amaningi ngenxa yesimo sawo kanye nenani labantu abawuhambelayo.”

Isihlalo sobukhosi bakaZulu sibe sembangweni kusukela ngo-2021 ngemuva kokukhothama kweSilo uZwelithini. Ukugcotshwa kweSilo uMisuzulu akwenzanga lutho ukuvimba izimbangi zakhe, abafowabo uMntwana uSimakade kanye noMntwana uBuzabazi.

Lo mkhosi womhlanga uhanjelwa izintombi ezingaphezu kuka-30 000 minyaka yonke esigodlweni saseNyokeni.

Izihloko zakamuva