Lubhalwe nguCelani Sikhakhane
Uzifake enkingeni owazama ukuzenza ifolosi loMkhonto weSizwe Party ngomkhonyovu okhethweni lokuchibiyela obekungenyanga edlule ku-ward 2 eMsunduzi njengoba iqembu selimumisile.
UMnuz Sithabile Nkabinde umiswe noSotswebhu woMKP esiShayamthetho saKwaZulu-Natal, uDkt Kwazi Mbanjwa (osesithombeni) obesanda kumiselwa elinye icala elithinta izimali zoMkhonto.
Omunye omisiwe uNksz Cebile Zuma oyilungu leMKP esiShayamthetho yena osolwa ngokusayina amaphepha okuqoka uNkabinde njengefolosi loMkhonto ekubeni ayazi kahle ukuthi ngokohlelo lweqembu lokuphakanyiswa umphakathi wayengaphumelelanga.
Kunalokho kuthiwa kwakuphumelele uMnuz Nkosinathi Mshengu.
Esitatimendeni iMKP ithe ifuna ukuba kucace ukuthi ayilona ikhaya lemidlwembe.
“Sifuna kube yisifundo nakwabanye ukuthi uMkhonto weSizwe akusilona ikhaya lemidlwembe nezephulamthetho, ” kusho isitatimende.
Lolu khetho lokuchibiyela obelungundabamlomnyeni, uMkhonto weSizwe Party ububhekene nempi enkulu yabaholi bangaphakathi kubangwa okuzofoloswa ngaye phakathi kukaMnuz Nkosinathi Mshengu noMnuz Sthabiso Nkabinde, nokusolwa ukuthi kube yimbangela yokuba ushawe uKhongolose, wathola amavoti angu-1160.
UKhongolose obugadla ngoMnuz Nduduzo Zuma kanti ukhale wemuka nalesi sigceme ngamavoti angu-1602.
UMnuz Willies Mchunu ugcine esefaka enkantolo abaholi baleli qembu eSishayamthetho okunguMnuz Thobani Zuma noDkt Kwazi Mbanjwa ngoba kubangwa okuzofoloswa ngaye.
UMchunu ubefuna uMnuz Nkosinathi Mshengu bese kuthi uZuma noMbanjwa bebefuna uNkabinde nokuvele emaphepheni aseNkantolo i-Scrolla.Africa esinawo.
Lesi senzo sikaMbanjwa noZuma simdine wathelwa ngamanzi uNobhala Jikelele woMkhonto weSizwe uMnuz Floyd Shivhambu njengoba sekugcine ngokuthi bamiswe bonke abathinteka ekufakweni kukaNkabinde ngomgunyathi.