Lubhalwe ngu-Anita Dangazele
UMivuyo Qabo (19) uhamba ngebhayisikili amakhilomitha angu-1 200 ukusuka eGqeberha uya ePitoli ukuyofuna ukuthi kuthathwe izinyathelo ngodlame olubhekiswe kubulili nokuhlukunyezwa kwezingane.
UQabo usebhale imemorandamu azoyidlulisela kuMengameli ngoSuku Lwamalungelo Abantu, ecela kufundiswe nge-GBV ezikoleni.
UMivuyo Qabo (19) wasuka eGqeberha ehamba yedwa ngebhayisikili elibangise e-Union Buildings ePitoli. Lolu hambo luthatha cishe amakhilomitha angu-1 200 kanti kulindeleke ukuthi luthathe phakathi kwezinsuku eziyisishiyagalombili kuya kweziyishumi.
UQabo ungumsunguli weMivuyo Qabo Foundation. Umkhankaso wakhe, obizwa nge-Cycle for Change Protect the Child, uhlose ukuqwashisa ngodlame olusekelwe kubulili (GBV), udlame lwasekhaya nokuhlukunyezwa kwezingane.
Uthe lolu hambo olunzima luhlose ukukhombisa umzabalazo kwizisulu eziningi ezibhekene nawo.
“Ngihamba ngebhayisikili njengophawu lomzabalazo nobuhlungu,” esho.
Uthe lokhu kugibela kuhloswe ngakho ukuqala izingxoxo ezweni lonke.
“Lolu hambo kuhloswe ngalo ukuthi lube wuphawu lwezingxoxo zezwe, ukuzibophezela komphakathi kanye nokuqwashisa kabanzi ngalezi zinkinga,” kusho uQabo.
Kulolu hambo uzoma emadolobheni ase-Eastern Cape, eFree State naseGauteng. Esitobhini ngasinye uhlela ukuhlangana namalungu omphakathi, izinhlangano kanye nabalandeli ukuze akhulume ngodlame olubhekiswe kwabesifazane nezingane.
UQabo uthe abantu abasha kumele babe yingxenye yesixazululo.
“Ngicabanga ukuthi kubaluleke kakhulu ukufakwa kwentsha ekulweni nokuhlukunyezwa ngokobulili, ngibona kufanele siqale ezikoleni,” usho kanje.
Uthe imfundo nokwelulekwa kungasiza ekuguquleni isimo sengqondo.
“Ngikholwa wukuthi ukweluleka kungenye yezindlela ezingasiza ekuguquleni izinto,” usho kanje.
UQabo ubhale imemorandamu azoyidlulisela e-Union Buildings ngoSuku Lwamalungelo Abantu. Ucela uMengameli ukuthi athathele izinyathelo eziqinile ngokumelene ne-GBV futhi kukhulunywe ngalokhu ezikoleni.
“Asihambi ngebhayisikili ukuqwashisa abantu bodwa,” usho kanje. “Sihamba ngalo ngoba ukuqwashisa ngaphandle kokwenza okuthile kuwumsindo nje.Sihamba ngoba sifuna ushintsho.”
Umasipala waseNelson Mandela Bay umncomile uQabo nalo mkhankaso.
Osesithombeni esingenhla: UMivuyo Qabo emkhankasweni wakhe we-Cycle for Change.
Umthombo wesithombe: Sithunyelwe