Lubhalwe nguDylan Bettencourt
UMengameli we-Athletics South Africa, uJames Moloi, usolwa ngokusebenzisa ikhadi le-federation endaweni yokucima ukoma nesitolo sezingubo zabesifazane.
I-ASA ithi ezinye izikhulu eziphezulu okubalwa kuzo ibamba le-CEO ne-Finance manager nazo zizophenywa ngokusetshenziswa budedengu kwezimali.
UMengameli we-Athletics South Africa (ASA) uJames Moloi umisiwe kuleli sonto ngemuva kokusolwa ngokusebenzisa budedengu imali.
I-ASA ithe ngoMsombuluko ibhodi layo lihlangane ngempelasonto lanikeza uMoloi usuku lwangoLwesihlanu mhlaka-31 kuMfumfu, ukuthi achaze isizathu sokuthi kungani kungafanele amiswe.
Lezi zinsolo ziphuma embikweni we-South African Sports Confederation and Olympic Committee (Sascoc), olandele uphenyo ngendlela esetshenziswe ngayo imali ye-ASA.
Ngokusho kwe-Portfolio Committee on Sport, Arts and Culture ePhalamende, uMoloi kusolwa ukuthi ubesebenzisa ikhadi le-ASA ukujabulisa izihambeli ethaveni nokuthenga izinto esitolo sezingubo zabesifazane.
I-ASA ithe uphenyo alugcini ngoMoloi, ezinye izikhulu eziphezulu, okubalwa ibamba le-CEO ne-Finance manager nazo ziyaphenywa.
UMoloi uqokwe okokuqala njengoMengameli we-ASA ngo-2021 waphinde waqokwa ekuqaleni kwalo nyaka.
IPhini likaMengameli uJohn Mathane kungenzeka angene esikhundleni sokuba nguMengameli obambile.
Yize ibhodi le-ASA linegunya lokumisa uMoloi, umkhandlu we-ASA kuphela ongamsusa esikhundleni unomphela.
Esithombeni esingenhla: UMengameli we-ASA uJames Moloi, osolwa ngokusebenzisa budedengu izimali zenhlangano.
Umthombo wesithombe: Athletics Africa