Arthur Greene
U-Emmanuel Macron uwine ihlandla lesibili njengoMengameli wase-France ngemuva kokubanga ukhetho neqembu likaMarine Le Pen, i-National Rally.
Ngemuva kokuwina ngeSonto ebusuku, uMacron ufunge wagomela ukuthi uzoba nguMengameli “wabo bonke” njengoba iqembu lakhe i-La Republique liqala umsebenzi wokuhlanganisa i-France ehlukene phakathi.
Yize uMacron ewine ukhetho ngokunethezeka ekugcineni ngo-58.5%, uLe Pen ngo-41.5% la mavoti ayirekhodi lelungelo lomuntu ongenele ukhetho.
Ngenkathi uLe Pen eqhudelana noMacron ngo-2017, wawina ngo-33.9%, kanti lokhu kukhombisa ukukhula kokuthandwa kwepolitiki emelene nabaphuma emazweni angaphandle e-France eminyakeni yamuva nje.
Enkulumweni yakhe ngevuma kokuhlulwa, uLe Pen ubize umkhankaso wakhe “njengokunqoba ngokwawo” njengoba efunga ukuthi uzoqhubeka nokulwa noMacron, isitha sakhe kwezepolitiki. Akazange ahalalisele ukunqoba kwesitha sakhe sezombusazwe, njengoba kuwumkhuba ukwenza lokho okhethweni lwase-France.
Njengoba impi yabo yezombangazwe iqhubeke ezinyangeni ezedlule, bobabili uLe Pen noMacron bangena empini enonya yamagama.
UMacron ubize uLe Pen “ngomuntu obandlululayo” ngezinqubomgomo zakhe eziqinile zokulwa nabaphuma emazweni angaphandle kanye ne-Islam. Khonamanjalo, uLe Pen, usole uMacron ngokuzonda abantu base-France nokuthi usebenzela abacebile kuphela.
Kuqubuke imibhikisho kuwo wonke amadolobha ase-Paris nase-Lyon ngesikhathi amavoti ephuma ememezela ukunqoba kwakhe. Amaphoyisa asebenzise isisi esikhalisa unyembezi ukuhlakaza imibhikisho enodlame enkabeni ye-Paris, kune vidiyo ekhombisa lokho ezinkundleni zokuxhumana.
Izixuku zababhikishi ikakhulukazi abasebancane bekungebona nje kuphela abalandeli bakaLe Pen kodwa nalabo abebethukuthele ngezinketho ezimbili kuphela ababekelwe zona.
Ekhuluma nezixuku phambi kwe-Eiffel Tower ngeSonto ebusuku, uMacron uvumile ukuthi abaningi balabo abamvotele bekungebona abalandeli bakhe, kodwa babevotela “ukukhipha” imbangi yakhe.
“Abaningi kuleli bangivotele, hhayi ngoba beseka imibono yami kodwa ngoba bebefuna ukuvimba imbangi yami. Ngifuna ukubabonga futhi ngiyazi ukuthi ngiyabakweleta eminyakeni ezayo,” usho kanje.
Abaholi abaningi bomhlaba bazwakalise ukukhululeka ngokuthi umholi oyimbangi kaMacron akazange athathe amandla kwelinye lamazwe aseYurophu anamandla futhi anethonya.
UMengameli wase-Ukraine uVolodymyr Zelensky uzwakalise ukweseka kwakhe uMacron, kanti uMengameli waseMelika uJoe Biden ubhale ku-Twitter emhalalisela.
Umthombo wesithombe: @TheGuardian
.
