Lubhalwe nguZukile Majova
Umhleli wezepolitiki
UMengameli uCyril Ramaphosa usefikile e-Poland ukuzoqala izingxoxo zokufuna uxolo nokuthula phakathi kwe-Ukraine ne-Russia.
URamaphosa ongomunye wabaholi abalalelwa uMengameli wase-Russia, uVladimir Putin angakwazi ukwakha ukuthula nokuxoxisana phakathi kwe-Russia ne-Ukraine.
Inkwazi okuyindiza kaMengameli ebiza u-R408 million ifike esikhumulweni sezindiza e-Warsaw Chopin ngoLwesine isuka e-Geneva, e-Switzerland okuyilapho uMengameli uRamaphosa abekhuluma khona engqungqutheleni ye-Work Summit.
Abanye abaholi base-Afrika abakuloluhambo noRamaphosa kubalwa uMengameli we-Republic of Congo
uDenis Sassou Nguesso, uMengameli wase-Egypt u-Adel Fattah al-Sisi, uMengameli wase-Senegal uMacky Sall, uMengameli wase-Uganda uYoweri Museveni, uMengameli wase-Zambia uHakainde Hichilema kanye no-Azali Assoumani uMengameli wase-Comoros futhi onguSihlalo wamanje we-African Union.
OMengameli kulindeleke ukuthi bathathe uhambo lwesitimela lwamahora ayisikhombisa besuka e-Poland beya e-Kiev beyobona uMengameli wase-Ukraine, uVolodymyr Zelensky ngoLwesihlanu ngaphambi kokulibangisa e-St Petersburg ukuyohlangana noMengameli wase-Russia uPutin.
Ukumiswa kwezikhali kubaluleke kakhulu kuleli njengoba lizosingatha ukuhlangana kwabaholi bamazwe e-Brics ngoNcwaba.
Ngokwemiyalelo ye-International Criminal Court, uMengameli uRamaphosa ungaphansi kwengcindezi yokuthi abophe uPutin uma ehambele le ngqungquthela.
I-ICC ikhiphe incwadi egunyaza ukuboshwa kukaPutin ngamacala empi okuhlanganisa nokudingiswa kwezingane zase-Ukraine ezweni lase-Russia ngokungemthetho.
Umphumela omuhle ovela kulo mkhankaso wokuthula uzoqeda uvalo lokuthi elakuleli lichema ne-Russia nakuba lithi alithathi hlangothi kwizingxabano ezikhona.
Izwe liphinde lasolwa iMelika ngokudayisela i-Russia izikhali nokuzihlanganisa ekuzilolongeni namasosha ase-Russia okuyiwona ahlaselayo.
URamaphosa uthe ukungathathi hlangothi kwizingxabano akusho ukuthi elakuleli alinalo uhlangothi ngempi yase-Ukraine.
“Lokho akusho ukuthi asinawo umbono ngombango we-Russia ne-Ukraine.”
“Ngokuvumelana nokuma kwethu ngezingxabano ezikwezinye izingxenye zomhlaba, umbono wakuleli owokuthi umphakathi wamazwe omhlaba udinga ukusebenzisana ukuze kunqandwe ukulwa ngokushesha futhi kugwenywe ukushona kwabantu nokuhamba kwezakhamuzi e-Ukraine.”