INkantolo ePhakeme yaseMpumalanga e-Nelspruit igixabeze owesilisa wase-Bushbuckridge ngezigwebo zodilikajele ezintathu neminyaka eyi-154 ngaphezulu.
UCollen Fakude ulahlwe ngamacala ayi-13 okudlwengula, ukubamba inkunzi ehlomile nokutholakala nesibhamu esingekho emthethweni.
Inkantolo iveze ukuthi uFakude wahlasela ngesihluku izisulu zakhe phakathi konyaka wezi-2017 nowezi-2018 ngaphambi kokuboshwa kwakhe ngoMandulo kowezi-2019.
Okhulumela amaphoyisa aseMpumalanga uColonel Donald Mdhluli uthe uFakude uthole isisulu sakhe sokuqala e-Ramalema ngase-Bushbuckridge silinde itekisi nesoka laso kowezi-2017.
Ubasabise ngesibhamu, wabayalela ukuba bangene ehlathini eliseduze, wabe esedlwengula loyo wesifazane ngesikhathi isoka lakhe liphoqelelwa ukuthi lime lodwa lingakwazi ukuzisiza. Ube esebagebenga ngaphambi kokubaleka endaweni yesigameko.
NgoNhlolanja kowezi-2018 wahlasela isisulu sakhe esilandelayo esasimise imoto yaso emgwaqeni ophakathi kwe-Bushbuckridge ne-Graskop ukusiza owesifazane onqunu.
Waqhamuka wamyalela ukuba ashayele imoto ehlathini eliseduze lapho afike wamdlwengula khona futhi wamphuca nezinto zakhe.
NgoNdasa ngawo lowo nyaka, uFakude wahlasela owesifazane wesithathu ngendlela efanayo. Ubenomfowabo e-Gardee Junction lapho ebabambe khona ngaphambi kokubayisa ezihlahleni eziseduze lapho afike wadlwengula khona loyo wesifazane phambi kamfowabo ngaphambi kokubabamba inkunzi.
Ngemuva kwezinyanga eziyisithupha, uFakude wadlwengula owesifazane phambi kwesoka lakhe e-Hlamanani Trust.
Amaphoyisa aqale ukuthungatha umenzi wobugebengu obedlula bonke kanti ubufakazi bokubhekela ubugebengu baholela kuFakude.
UFakude wake wagwetshwa iminyaka engama-27 ebhadla ejele ngonyaka wezi-2003 yiNkantolo yesiFunda yase-Mhala ngamacala afanayo ngaphambi kokuthi akhishwe kowezi-2013.
.
