Lubhalwe nguPalesa Matlala
UMduduzi Mnisi uphume ejele ezinyangeni ezintathu ezedlule kanti manje ubhekene necala lokubulala intombazane yesikole uLikhona Fose.
Isidumbu sale ngane eneminyaka engu-14 ubudala sitholwe sinqunywe esikhotheni eduze komuzi wakubo ose-Durban Deep ngabantu bendawo.
Owesilisa ophume ejele ezinyangeni ezintathu ezedlule uboshelwe icala lokubulala ngesihluku uLikhona Fose (14).
UMduduzi Mnisi (39), uvele eNkantolo yeMantshi yase-Roodepoort ngoMsombuluko.
Lo mfundi owenza u-Grade 8 e-Durban Deep uduke usuku olulodwa ngaphambi kokuthi abantu basendaweni yangakubo bathole isidumbu sakhe esinqunyiwe ehlathini eduzane.
Amaphoyisa abophe uMnisi ngemuva kokumbuza imibuzo amthwesa icala lokubulala obekuhleliwe ngesikhathi ubufakazi buveza ukuthi wayibulala intombazane.
Inkantolo ilalele ukuthi uMnisi ungaphandle ngoshwele ngemuva kokungena ejele ngecala lokuzama ukubulala umuntu nokweba ngo-2007. Ubenezinyanga ezingaphansi kwezintathu ekhishiwe.
Ummeli wakhe uthe uMnisi akaneme ngesitokisi sakhe, wathi akanambhede nengubo yokulala. Inkantolo izinqabile izikhalazo zakhe.
Icala lihlehliselwe umhlaka-18 kuNhlangulana ukuze umbuso uthole ubufakazi obengeziwe obungamvimba ukuthi athole ibheyili.
Owesifazane wendawo, uLolo Maswangani, utshele iScrollla.Africa ukuthi uFose wayeyingane elungile futhi ethanda ugogo nomalume wakhe.
“Kukhona owabona uLikhona ehamba nale ndoda ngaphambi kokuthi etholakale elele enqunu nezitho zomzimba zingekho ehlathini. Wamnquma ikhala nezitho zangasese. Akumele neze athole ibheyili noma ushwele,” kusho uMaswangani.
UMaswangani uthe ukubulawa kwabantu okubi kukhomba ukuthi i-Durban Deep iyindawo eyingozi.
Okhulumela i-NPA e-Gauteng uPhindi Mjonondwane uthe umbuso uzizwa unesiqiniseko ngokuwina icala.
“Sinezizathu ezizwakalayo zokucabanga ukuthi singamnqoba. Ubhekene namacala okubulala ahleliwe, okuyicala elibi kakhulu, uma etholakala enecala angagwetshwa udilikajele,” kusho uMjonondwane.
Umbuso uzolwela ukuthi angayitholi ibheyili uma esebuyela enkantolo.
Esithombeni esingenhla: Umsolwa.
Umthombo wesithombe: Sithunyelwe