Lubhalwe nguBuziwe Nocuze
Izakhamizi zasemijondolo yaseCovid Joyce Bangene eWitsand, e-Atlantis, ngaphandle kweKapa, zibhikishe zaphanga amaloli amahlanu zashisa elilodwa ngoLwesibili ebusuku.
Amaphoyisa aseWestern Cape abophe abasolwa ababili ngamacala odlame emphakathini namanye.
Isakhamuzi esiligodlile igama laso sithe: “Sinqume ukubhikisha ngoba idolobha alisinaki. Kade sicela amanzi nogesi, kodwa basitshela ukuthi sakhe endaweni yangasese.
“Ngesikhathi sikhankasela ukhetho akekho owake wakhuluma ngalokhu. Amavolontiya eqembu lepolitiki abelapha ecela amavoti ethu. Manje sifuna izinsiza, sitshelwa ukuthi umhlaba akusiwo owedolobha,” kwengeza isakhamuzi.
Abantu selokhu behlala kule ndawo kusukela ngo-2021.
“Abanye abantu bathi sibasha, kodwa lokho akusho lutho. Sidinga izinsiza. Asikwazi ukulinda futhi ngeke sime singakazitholi,” kusho isakhamuzi.
Kuyamjabulisa ukuthi amaphoyisa abophe ezinye izakhamizi ngokwenza udlame.
“Saxwayisa abantu ngokuphanga ngesikhathi kunemibhikisho. Asizange sibhikishele ukuphanga besifuna ukunakwa nokuthola izinsiza. Ngokudabukisayo izigebengu zisebenzisa imibhikisho yethu ukwenza ubugebengu. Badinga ukujeziswa,” kusho isakhamuzi.
Ukholelwa ukuthi ukuboshwa kuzokwenza abantu bacabangisise ngaphambi kokuphanga ngesikhathi semibhikisho.
“Amaloli ashisiwe, bekungeyona inhloso yethu. Kumele bathole izigwebo ezinzima ukuze bathumele umyalezo oqinile kunoma ngubani ocabanga ukuphanga ngesikhathi kuqhubeka imibhikisho,” kusho isakhamuzi.
Okhulumela amaphoyisa aseWestern Cape uSergeant Wesley Twigg uthe: “Kuboshwe abasolwa ababili abaneminyaka engu-22 no-28 ubudala kanti babhekene namacala okudala udlame emphakathini, ukucekela phansi impahla kanye nokweba imoto.”
UMkhandlu waseKapa uthe u-Eskom unesibopho sokuhlinzeka ngogesi kule ndawo.
Isithombe esingenhla: Iloli lokheleke ngomlilo.
Umthombo: Sithunyelwe