Lubhalwe nguDylan Bettencourt
UFikile Mbalula ufuna iNkantolo eNkulu yasePitoli iyalele uBrown Mogotsi ukuba ahoxise izinsolo zakhe zokubulala, axolise futhi ayeke ukusabalalisa izinsolo ezingamanga.
UMbalula uthi lokhu kusolwa kubeka impilo yakhe engcupheni futhi kulimaza umndeni wakhe, egcizelela ukuthi ababulali bangempela base beboshiwe ngo-2015.
UNobhala-jikelele we-ANC uFikile Mbalula useyise uBrown Mogotsi enkantolo ngemuva kokusolwa ngokubulala ezingxoxweni zomphakathi.
UMbalula, owake wateketiswa ngegama elithi ‘Mr Fear F*kol’, ucele iNkantolo eNkulu yasePitoli ukuthi ivimbele uMogotsi ezinsolweni zokuthi uyathinteka ekubulaweni kukasomabhizinisi uWandile Bozwana ngo-2015.
Ufuna kuhoxiswe ngokugcwele, axolise esidlangalaleni aphinde akhokhe namademeshe ka-R500 000.
Emaphepheni asenkantolo uMbalula uthe lawa manga abeka impilo yakhe engcupheni. “Umndeni nabangane bakaMnu Wandile Bozwana benziwa ukuthi bakholelwe ukuthi yimina onecala lokubulala,” esho, kubika i-Sunday World.
Uthe abantu ababulala uBozwana sebegwetshwe iminyaka engu-30. “UMnu Bozwana wayengumngane wami kanye neqabane lami. Ngangingenaso isizathu sokwenza into enjalo.”
UMbalula uthe uMogotsi uphinde wasabalalisa amanga ngomkakhe uNozuko, emhlanganisa nesivumelwano sokwakha e-Free State.
Ubize lezi zinsolo ngokuthi ngamanga aluhlaza wathi uma uMogotsi ewakholelwa ngempela, bekufanele aye emaphoyiseni esikhundleni sokukhuluma nabezindaba.
UMbalula ufuna inkantolo iveze ukuthi lezi zitatimende zingamanga futhi yenze uMogotsi akhokhe izindleko zecala.
UMogotsi usalelwe uLwesibili ukuthi asho noma uzolilwela yini leli cala futhi kuze kube umhlaka-18 kuLwezi aziphendulele enkantolo.
Esithombeni esingenhla: UNobhala-Jikelele we-ANC, uMnuz Fikile Mbalula, usefake amaphepha enkantolo ephikisana noMnuz Brown Mogotsi.
Umthombo wesithombe: Ifayela