Lubhalwe nguZukile Majova
Wonke umuntu ufuna ucezu kuMasipala waseMhlathuze – ikhaya le-Richards Bay Coal Terminal.
Kanti njengoba kunesihlalo esisodwa emkhandlwini esihlukanisa umfelandawonye oholwa i-ANC noholwa i-IFP, umasipala ungathathwa yinoma yimuphi umfelandawonye.
Umfelandawonye oholwa yi-IFP, uhlanganisa i-IFP, i-DA, i-African Christian Democratic Party kanye ne-Freedom Front Plus, yiwona ophethe lo mkhandlu ngezihlalo ezingu-34 uma kuqhathaniswa nezihlalo ezingu-33 zomfelandawonye oholwa i-ANC okuhlanganisa i-ANC, i-EFF kanye ne-National Freedom Party.
Nyakenye i-IFP yawina okhethweni lokuchibiyela obelubhekwe ngabomvu ku-ward 12 eMadlankala – yathatha isigceme esasiphethwe i-ANC kusukela kwaqala intando yeningi.
I-EFF ibukeka ifuna ukulawula kwayo kwezombusazwe ukuze iphazamise ukuthunyelwa kwamalahle kwamanye amazwe adlula echwebeni.
USihlalo we-EFF esifundazweni uVusi Twala uhlela amalungu e-EFF angaphezu kuka-10 000 azovala ichweba lase-Richards Bay njengengxenye yokuvalwa kwechweba kuzwelonke ngomhlaka-20 kuNdasa.
Itheminali ekwazi ukuthwala amathani angu-90 million ngonyaka iwumgogodla wezingxoxo mayelana nenkinga yamandla eza amabhizinisi engebinawo amandla amahora ayishumi kuya kwangu-12 ngosuku.
UMengameli uCyril Ramaphosa indoda ephethe u-Just Transition enesabelomali sika-R131 billion esuka emalahleni iye kumandla avuselelekayo, uthe izimboni zokuphehla ugesi ngamalahle ngeke ziphele.
Abashisekeli benkolo yamalahle bathi amalahle athunyelwa ngaphandle ngechweba adala ukushoda kwamalahle ezinga eliphezulu eziteshini zakwa-Eskom eziphehla ugesi ngamalahle.
I-EFF ifuna ukuthi inikezwe uMhlathuze ukuze izozibambela mathupha nokuyinto eyenza leli qembu lahoxa kumfelandawonye walo ne-IFP komasipala abangu-20 baKwaZulu-Natal.
UMengameli we-IFP uMnu Velenkosini Hlabisa uthe abasoze bawuyeka umasipala onesabelomali sika-R3.5 billion ongowesithathu ngobukhulu KwaZulu-Natal ngemuva kweTheku noMsunduzi (Mgungundlovu).
Idolobha elihlanganisa i-Richards Bay, iMpangeni, i-Heatonville kanye ne-Buchanana eNtambanana nalo liyindawo ebalulekile yokuvakasha.
Okungenani kuneziqiwu ezinhlanu endaweni kanye namaxhaphozi ahlukahlukene adonsa izinkulungwane zezivakashi kule ndawo minyaka yonke.
Esithombeni esingenhla: Itheminali yamalahle e-Richards Bay kuMasipala waseMhlathuze
Umthombo wesithombe: @swagefast