Lubhalwe ngumbhali weStaff
Umama wesihlabani somculo esingasekho emhlabeni uCosta Titch uye ekhasini lendodana yakhe le-Instagram eyocela usizo lokuthola imbangela yokushona kwayo kungazelelwe.
UCostantinos Tsobanoglou uzwakalise ukwesaba kwakhe ngokuthi uma ngempela kuwukuthi indodana yakhe idliswe ushevu, owenze lokho angase abalekele ubulungiswa ngenxa yenqubo ende yokuhlolwa kwe-toxicology eyenziwa i-National Health Laboratory Services.
“Akusimina ngedwa umama osalinde izimpendulo kuleli. Uma kuwukuthi kunomuntu odlise indodana yami ushevu angabalekela umthetho,” esho. Ngicela usizo lokuthola le miphumela ngoba namaphoyisa awakwazi ukuqhubekela phambili ngaphandle kwayo.
Ngokusho kweziphathimandla lo mculi (28) uquleke ngesikhathi ecula ekhonsathini ye-Ultra South Africa e-Nasrec eGoli ngobusuku bangomhlaka-11 kuNdasa.
Sekuqaliswe uphenyo kanti ukuhlolwa kwesidumbu yikho okuzosho imbangela yokudlula kwakhe emhlabeni.
UCosta Titch obedume ngengoma yakhe eshisa izikhotha ethi-“Big Flexa” waduma kakhulu ngesikhathi ecula ngokubambisana nabaculi abadumile abafana noC’Buda M, uBanaba Des, uMan T, uSdida kanye no-Alfa Kat.
Ukushona kwakhe kuze ngemuva kwenyanga imboni yomculo yakuleli ezilele ukudlula emhlabeni kukaKiernan Forbes obedume ngelika-AKA.
Esitatimendeni esithunyelwe ezinkundleni zokuxhumana umndeni kaCosta Titch uqinisekise ukushona kwakhe wazwakalisa ukubonga ngothando nokwesekwa okuvela emphakathini.
“Ukufa okuvakashele umndeni wethu uhlwithe indodana yethu ethandekayo, umfowethu kanye nomzukulu wethu uConstantinos Tsobanoglou (28) obedume kuleli ngaphansi kwegama lesiteji elithi Costa Titch. Sigcwele usizi njengoba samukela ukudlula kwakhe emhlabeni.”
Esithombeni esingenhla: Isihlabani somculo esingasekho uCosta Titch