Doreen Mokgolo
UGloria Mhlongo wabukela ngesikhathi umbelethisi ethatha ingane yakhe yomfana, ethi uyoyikala.
Kodwa lokho kwenzeka eminyakeni emithathu edlule kanti kwakungokokugcina umama oneminyaka engama-29 ubudala ebona ingane yakhe. Futhi kwaba usuku lokugcina lapho kwabonwa khona umbelethisi owayesiza.
Umndeni ukholelwa ukuthi umbelethisi olahlekile wantshontsha ingane yakhe.
UGloria wabeletha eMtholampilo i-Refentse e-Stinkwater e-Tshwane, futhi kuze kube namuhla, imizamo yakhe yokuthola izimpendulo ihlangana nenhlamba nokuntuleka kokwesekwa okuvela eMnyangweni Wezempilo.
“Ngemuva kokuteta, umbelethisi wenqaba ukuthi ngibambe ingane yami. Wangibuza ukuthi ngifuna ukubona ini ngaphambi kokufaka ingane egumbini elilandelayo. Wathi angizihlanze wangishiya ngiphumule ewadini,” kusho uGloria.
Ngesikhathi uGloria evuswa ngemuva kwamahora ambalwa ekhishwa esibhedlela, umndeni wakhe weza ukuzomlanda kodwa batshelwa ukuthi bagoduke ngaphandle kwengane.
“Ngangikhathele futhi ngididekile. Ugogo wabuza ngengane kumbelethisi kodwa wathi ngeke akhulume naye ngoba akayena umama wayo.”
Ngakusasa ekuseni, umndeni wabuyela emtholampilo lapho umphathi abatshela khona ukuthi umbelethisi abamfunayo ubalekele umsebenzi.
Izikhulu zasemtholampilo zahlola amakhaza ukubheka ukuthi ingane ishonile yini.
“Indodana yami ibingekho emakhazeni,” kusho uGloria.
UMnyango wezeMpilo wavula uphenyo kodwa akuzange kwenzeke lutho.
Uthe isikhulu ebesinikezwe leli cala simtshele ukuthi ngeke sikwazi ukumsiza, sabe sesimeluleka ukuthi aqoke ummeli.
“Ngikholwa ukuthi umbelethisi ukwenze lokhu kimi ecabanga ukuthi ngeke ngililandele leli cala,” kusho yena.
I-Scrolla.Africa ikhulume noMnyango wezeMpilo e-Gauteng othe bayaphenya ngaleli cala wathembisa ukuthi bazophendula.
Bebengakaphenduli ngesikhathi sokushicilela.
Umthombo wesithombe @GloriaMhlongo