Lubhalwe nguNkhensani Mthombeni
Umlandeli omkhulu webhola owaziwayo kuleli uMama Joy kungenzeka abophe ifindo likasofasilahlane nesithandwa sakhe esisha esiteketiswa ngoPapa Joy khona maduze nje.
UMama Joy, olandela neminye imidlalo yaseNingizimu Afrika, ogama lakhe langempela nguJoy Chauke, utshele i-Scrolla.Africa ukuthi isoka lakhe lase-France, uPapa Joy, uzovakashela umndeni wakhe ngoMandulo.
UMama Joy use-France kuma-Olympics futhi uchitha isikhathi nomlingani wakhe uPapa Joy, ahlangane naye ngonyaka odlule e-Paris ngesikhathi seNdebe yoMhlaba yoMbhoxo.
Uveze ukuthi wamkhokhela indiza yakhe eya e-Paris.
“NgoMandulo kuzofika uPapa Joy ezohlangana nomndeni wami kanti usebatshelile ukuthi uyeza uzokhuluma nabo ukuthi sizoqhubekela kanjani phambili sakhe impilo ndawonye. Lokhu kuvakasha kuzokhombisa wonke umuntu ukuthi uPapa Joy ukhona ngempela akusiwo amanga,” kusho yena.
UMama Joy ujabulile ngokuba se-France ngemuva kokuvakashela umama kaPapa Joy ambiza ngomamezala wakhe.
Umamezala unike uMama Joy indandatho yegolide newashi ukukhombisa ukuthi uyamamukela njengengxenye yomndeni.
Uthole nezicathulo nezinye izipho.
Lo mlandeli ohamba phambili weRoyal AM uthe uzoyikhumula indandatho ayinikwe ngumamezala wakhe uma uPapa Joy esemthengele indandatho yomshado.
Uvamise ukwabelana mayelana nesikhathi sabo ndawonye ezinkundleni zokuxhumana, okuhlanganisa nokugibela imoto yohlobo lwesilahla ukuzungeza idolobha nokuhamba noPapa Joy ukuya emsebenzini, bejabulela ukugibela isitimela esihamba phambili.
UPapa Joy naye umethule kozakwabo nomakhelwane.
UMama Joy uphinde wabelana ngokuthunyelwe ngabalandeli bakhe bekhuluma ngemali yamalobolo okungenzeka uPapa Joy kufanele ayikhokhe.
Esithombeni ngenhla: Umama noPapa Joy.
Umthombo: Uthunyelwe