UMalema weseka Isilo ngoNdunankulu kaZulu omusha

Lubhalwe nguCelani Sikhakhane noMlungisi Gumede

Umholi we-EFF uMnuz Julius Malema uthi ngisho abantu bethanda bengathandi kodwa kumele ahlonishwe uNdunankulu kaZulu omusha uMfundisi Thulasizwe Buthelezi.

UMalema ukusho lokhu njengoba ekhuluma enkundleni yemidlalo iMoses Mabhida eThekwini lapho ethula khona usomqulu wezethembizo ze-EFF zokhetho.
Uthe yize bemazi uButhelezi ukuthi uyiliphi iqembu lezombusazwe kodwa lokhu akusho ukuthi kumele bangamhloniphi njengoNdunankulu kaZulu.

“UThulasizwe Buthelezi siyazi ukuthi ungusopolitiki waliphi iqembu kodwa lokho akusho ukuthi kumele singasihloniphi isinqumo seSilo,” kusho uMalema.
Ukusho lokhu nje abanye osopolitiki basavungama ngokuqokwa kukaButhelezi.

ESandlwana kwathi Isilo singamemezela igama lakhe, bavele badinwa bashiya ukudla bangena ezimotweni bajokola.

IMeya yeTheku uMnuz Mxolisi Kaunda ithi yona ayisoze yamhlonipha uButhelezi njengoNdunankulu kaZulu ngoba usangusopolitiki ofana nayo.

Kuphinde kwaqhuma inhlokomo ngesikhathi uMalema ethi abantu kumele bazi ukuthi sisodwa Isilo kwaZulu.

Uthe uMisuzulu kaZwelithini wazalelwa isihlalo ngakho ayikho inkantolo ezovimba lokho.

“Konke lokhu okwenziwa ezinkantolo sekuyizaba nje kodwa Isilo sisodwa KwaZulu futhi siyofa la sifa khona iSilo uMisuzulu kaZwelithini,” kusho uMalema.

Ukusho lokhu nje uMntwana uSimakade umagange ufuna isihlalo njengoba udaba seluyiswa enkantolo yokudluliswa kwamacala e-Bloemfontain.

Izihloko zakamuva